La plie paidbah ïa ka surok na Umsaw Domhoi-Mawshuti

Shillong, Nailur 21 : U Bah Samlin Malngiang MLA ka Sohïong u la ong ba kum u MLA ha ryngkat u BDO bad ki nongkitkam shnong ki la shah pynbud nam ha ka jingpyntrei ïa ka surok Umsaw Domhoi kaba pynïasoh sha Mawshuti da ki katto katne kiba la ai FIR pyrshah ïa ki.
Ïa kane u Bah Samlin Malngiang u la ong haba ai jingkren ha ka jingïalang plie paidbah ïa katei ka surok shnong kaba pynïasoh na Umsaw Domhoi sha Mawshuti ha ka sngi Nyngkong mynta ka taïew.
U la ong ba kum u MLA nyngkong u kwah shwa ban shna ïa ka surok na bynta ka jingmyntoi ki paidbah ban suk ka leit ka wan bad bthah ruh ïa u BDO ban sdang noh shaid shaid hynrei hapdeng ka jingïaid lynti ïa katei ka kam ka la don ka jingshah pynthut.
“Nyngkong nga la ai bthah ïa u BDO ban shna shwa ïa ka sruok namar kadei kaba donkam tam na bynta ki paidbah ban suk ka leit ka wan bad ruh kane ka kam ka la ïaid shaid shaid hynrei kyndit kynsan la wan kah u lyoh badum ha kaba ki katto katne ki la ujor FIR pyrshah ïanga, u BDO bad 10 ngut ki nongkitkam shnong da kaba kynnoh ba ngi la bamsap,” ong u Bah Samlin.
“Nga la kyndit bad ym tang katta kum u MLA nga la sngewlehraiñ ba la shah thad pynjah burom ïa ka shnong baieit jong ngi ïa kaba hanga hi ngam kwah ban shah thad pyrthei ïa ka shong ka thaw namar ka ktah matïong ïa ka shnong. Nga kwah ba ka shnong kan mih ha ki kot khubor ba ka la kiew ka la bha ka shongsuk shongsaiñ. Hynrei ka mih pynban ba ki nongkitkam shnong ryngkat u MLA bad BDO ki la ïa bamsap,” la ong u Bah Samlin.
U la ong ruh ba ha ka jingpyntrei ïa katei ka surok ki don katto katne ki longkmie kiba la shah ïalam bakla ba katei ka skhim kam dei tang ban ïoh ka surok hynrei dei ban ai mar 10 hajar tyngka kawei ka thliew ïing. Shuh shuh u la ong ruh ba ha ka jingpyntrrei ïa katei ka surok kum u MLA ha ryngkat u BDO bad ki nongkitkam shnong ki la shah khot hajir ha ki pulit bad ruh ha ka ïing bishar ba donburom ka Meghalaya High Court.
Hynrei u pynpaw pat ka jingsngewkmen ba hadpeng ka jingïaid lynti kaba eh ki longkmie ki la sngewthuh ba kadei tang ka jingshah ïalam bakla ha kaba ïa katei ka surok la lah ban plie paidbah kaban long ruh ka jingkyrkhu na bynta ki paidbah nong shong shnong.
U Bah Samlin u la ïathuh ba ïa kate ka surok la dei ban plie paidbah noh mar syn dep trei. “Ïa katei ka surok la dei ban plie paidbah noh mar syn dep hynrei namar ka don ka hukum na ka ïing bishar halor ka jingshah kynnoh ba ma nga (Bah Samlin) nga la pyndonkam bakla ïa ka pisa bad nga ruh nga la ïakhun ïa ka case bad nga la jop pyrshah ïa kiba la ujor pyrshah ïanga,” la ong u Bah Samlin.
Ìa katei ka surok lyngba ka skhim DMF kaba la mang tyngka ha u snem 2020 kaba kot sha ka 96,57,500 tyngka la lah ban pyndep noh mynta u 2022 ha kaba u Bah Samlin Malngiang ha ka sngi Nyngkong mynta ka taïew u la plie paidbah ha ryngkat ka jingdonlang u MDC Bah Sherbor Mawlong, BDO ka Sohïong C&RD Block Bah B. Sungoh, Lyngdoh ka Sohïong Bah BL Thabah, ki nongkitkam shnong jong kitei ki ar tylli ki shnong ki longkmie longkpa bad ki khun samla.