Mawkyrwat, ‘Nailur, 21: Ka Hynñiewtrep National Youth’s Front (HNYF) jong ka South West Khasi Hills District ka la lum ïa baroh ki Unit bad ki Circle na ki dong bapher bapher jong ka South West Khasi Hills District kum ka jingïakynduhlang kyrpang ban pynkhlaiñ ïa ka jingtreikam jong ka seng.
Ha kane ka jingïalang la ïathir ïatai ha kaba ïadei bad ki mat kiba ktah ïa ka imlang ka sahlang bad ruh ïa ki shibun ki mat jingdawa na ka Sorkar ha kaba ïadei bad ka roi ka par jong ka South West Khasi Hills District hi baroh kawei kum ka jingbym biang ki surok, ki lynti ki synkien, ki jaka sumar ha ka liang ka koit ka khiah ha kaba ka seng ka ju ïai angnud ban bud-dien la ha kano kano ka rukom ki kam pynroi hapoh jong ka distrik ki suki khamtam hapoh ka distrik Head Quarter jong ka Mawkyrwat.
Ha katei ka jingïakynduhlang ka phang pdeng jong ki unit bad ki circle ka long ban ïoh ruh ka jingmynjurlang ba namar ka jingmih bun ki jingsniew ha kine ki sngi la donkam ban pynïar ïa ki shnat treikam jong ka seng ha manla ki dong jong ka South West Khasi Hills District bad ban long kiba peitngor ha ki shnong ki thaw halor ka jingkynrei jong ki jingsniew kiba mih ha kine ki sngi kiba la ktah ïa ka imlang ka sahlang khamtam ruh ka jingshah ïalam bakla jong kiba bun ki khun samla ha kane ka juk kaba mynta.
Ha kane ka sngi la ïoh ruh ka jingkren na ki nongkitkam jong ki unit bad circle baroh halor ka rukom treikam jong ki.
Ki nongkitkam kata na u bah Shimbor Langte, Working President, bah Shining Wanniang, Vice President bad kiwei kiwei ki la ai mynsiem bad kyntu ïa ki unit bad ki circle ban don ka jingïaieit, ka jingïatyllilang kawei.
Ki nongkitkam ba thymmai jong ka Hynñiewtrep National Youth’s Front (HNYF), South West Khasi Hills District ki long President u Khrawbok Snaitang, Working President u Shimborlin Langte, Vice President u Anthony Wanniang bad u Shining Wanniang, General Secretary u Khrawbok Mawleiñ, Assistant Secretary u Losmandar Marweiñ, Finance Secretary u Micheal Wanniang, Publicity Secretary u S.K. Naior, Assistant Publicity Secretary u Wanteibok Wanniang, Disciplinary Secretary u Roshanroy Lyngdoh, Sports Secretary u u Jovial Rani lem bad kiwei de.
