Khliehriat Nailur 16: Ka jingsniew shapalat pud jong ka surok bah (NH-6) kaba la wanrah khah khah ïa ka jingthuh bad ka jingsahkut kali ha kiba bun ki bynta jong une u surok kaba la buh jingeh shikatdei ïa ki nongleit nongwan khamtam ha ki bynta jong ka shnong Lumshnong haduh Malidor, East Jaiñtia Hills.
Dang shen ruh na ka daw jong ka jingpynjulor jong u lapbah ha ki khyndiat bnai ba la lah kala wan rah ka jingdkhoh kaba jur ha ka leit ka wan jong ki nongshong shnong ka thaiñ (East Jaiñtia) bad wat ïa ki nongleit nongwan na kiwei pat ki jylla kiba dei ïaid lyngba une u surok bah, namar ki hap ban mat ïa ka jingsahkut kali kali kaba da ki bun bun sngi.
Kumta ban pynkloi ïa ka jingmaramot ïa ki bynta kiba sniew kiba la ieh sah da ka National Highway Authority of India (NHAI) na ka liang jong u wei na ki nongshong shnong ka thaiñ u ma Kynjaimon Amse ula leit ban tied jingkhang sha ka ïing bishar ba donburom jong ka Meghalaya High Court.
Ha kaba ïadei ba kane na ka liang ka Meghalaya High Court ha ka jingshong bishar ïa ka Mukotduma u Kynjaimon Amse pyrshah ïa ka NHAI ha ka 15 tarik mynta u bnai kala pynmih ïa ka rai ba ka NHAI ka dei ban buh por bad pynthikna lano kan maramot noh ïa kine ki bynta bala sniew jong u NH-6.
Kumta ka Meghalaya High Court kala bthah ïa ka NHAI ba kan wanrah ïa kane ka kaiphot ha khmat ka ïing bishar ha ka 29 tarik mynta u bnai.
