6.27 lak mang jingïarap ka tnat Agriculture sha ki nongrep kwai ha Umrawrang bad Dangar

Shillong, Nailur, 13: U Myntri ka tnat ka Rep ka Riang ka Sorkar Jylla u Bah Banteidor Lyngdoh ha ka sngi Baar u la ong ba ka tnat ka dang ap ïa ka jingtohkit ïa ki nuksa jong u kwai ba la bam khñiang ba la lum da ka ICAR, Umïam shwa ba ban shim ïa kino ki lad ban weng ïa kane ka jingshah ktah jong ki nongrep kwai.
U Myntri u la ai ïa kane ka jubab ha ka Call Attention Notice ba la wanrah da u MLA ka Mawsynram u Bah Himalaya Shangpliang, uba la pynpaw ïa ka jingsngewkhia halor ka jingbym leh eiei jong ka Sorkar ban weng ïa ka jingshah ktah jong ki nong rep kwai na ka jingbam khñiang jong u kwai lung ba dang shu mih.
U Bah Lyngdoh u la pyntip ha ka 22 tarik, Nailur, ïa ka shithi ba la pynskhem la ïoh pdiang na kaICAR for NEH Region, Umïam kaba la phah tohkit ha ki 6 ngut ki Scientists ba la khlieh da u Principal Scientist, Soil Science u Dr S. Hazarika ban pynlong ka jingleit tohkit sha ka bri rep kwai ba la shah ktah ha ka shnong Umsawrang bad Dangar kiba hap hapoh ka Mawsynram C&RD Block ryngkat lang bad ki ophisar jong ka Directorate of Horticulture.
Ha ka 29 tarik, Nailar ka kynhun jong ki riewshemphang kaba kynthup ïa u Soil Science Scientist, u Sr. Scientist Plant Pathology, u Sr Scientist Plant Physiology, u Entomologist bad Environmental Science Scientist lem bad ki ophisar jong ka department ki la pynlong ka jingleit jurip sha ka shnong Umsawrang bad Dangar bad ki ophisar jong ka Directorate of Horticulture, u la ong.
Shwa kane, ha ka 7 tarik haduh 10 tarik, Nailar, ka kynhun jong ki Ophisar na ka Directorate of Horticulture ki la leit jurip ïa ka Directorate of Arecanut and Spices Development (DASD), Calicut bad IISR, Kasaragod Kerala ban ïathir ïatai halor ka jingbam khñiang jong u Kwai ba dang shu sdang thylleng.
U la ong ba ka Sorkar ka la sngewkhia bha shaphang ka jingeh jong ki nongrep bad khamtam ïa ki nongrep kwai kiba la mad ïa kane ka jingeh.
“Ngi la shim bun ki lad ki lynti ban siew bailutksan sha ki nongrep da kaba ai bujli ïa ki mar rep khnang ban ïarap ïa ki,” la ong u Myntri.
U la pyntip ba ka department of Agriculture and Farmers Welfare lyngba ka Fruit Development Scheme ka la mang pisa 6 klur 27 lak ban sam ïa ki symbai jingthung kum ka jingïarap ïa ki nongrep kwai ba la shah ktah na ka bynta u snem 2022-23.
Ïa kane ka skhim ladep pyntreikam bad la khmihlynti ba yn sa sam sha ki lai lak ar hajar saw spah ngut ki nongrep kait kiba rep ha ka bri kaba ïar 189 hektar, hynñiew phew lai lak khyndai phew san hajan tyli ki tynrai kait ban thung ha ka jaka kaba ïar 170 hektar.
Nalor kata, ka Department ka la buh ai ruh ïa ki tiar jingïada kum ka jingsynreit dawai, ki dawai ban ïada na ka jingbam khñiang ïa kiba yn sa leh ynda la kut ka lyiur.
U la ong shuh shuh ba ki jingthung kum ka kait bad u soh trun ladep sam sha ki nongrep katkum ka jinglong jingman jong ka jaka. Kine ki jingthung ki dei kiba yn da jied sani bha khnang ba ki nongrep kwai kin dup lah ban rep bujli da kine ki mar rep ban pynim jakpoh ïa ki.
U Myntri u la ong ba ka tnat ka la shim khia bha ban ai jingkyrshan ïa ki nongrep ha ka jylla ba kin pyndonkam noh da ki tiar katkum ka juk mynta kum ki Drone bad ban ai ruh ïa ki symbai jingthung bad ki lad jinghikai ban ïada ïa ki mar rep.
Da kine ki lad, ka tnat kan sa pyntreikam nyngkong eh da kaba synreit ïa ka dawai Bordeaux Mixture ïa ki bri rep kwai ha ka jylla Meghalaya khnang ban dup sngewthuh haduh katno kane ka dawai kan ïarap.
Ïa kane ka jingsynreit dawai la pynlong ha ka shnong Umsawrang, kaba hap hapoh ka Mawsynram C&RDblock, East Khasi Hills District bad ha Rongsingre kaba hap ha Chokpot C&RD Block, South Garo Hills District.
U la ong ba ïa kane ka kam la kyrshan ruh da ka MBMA lem bad ki ophisar na ka Directorate of Horticulture.
Kiba bun ki nongrep ki la ïaroh halor ka jingpyndonkam ban synreit da ka dawai Bordeaux Mixture bad ki la kyrpad ruh ban biang kum kane ka lad jingïarap ha ki sngi ki ban dang wan.
“Namarba ka dang dei ka por slap, kam long satia ban synreit dawai than. Hynrei tang shu kut ka aiom lyiur, ka tnat kan sa sdang biang ïa kane ka jingsynreit dawai,’ u la ong.
U la ïathuh ruh ba ïa ki Drone la shim wai na ka Jylla Andhra Pradesh da ka jingïarap jong ka MBMA.