Tura, Lber 30 : Ka Garo Student Union (GSU) ka pynrem jur bad kynnoh shet kylla jaidbynriew Garo ïa ka Executive Committee jong ka NPP ha Garo Hills Autonomous District Council (GHADC) ba la ïalam da u Albinuish R Marak kum u CEM bad Nikman Ch Marak kumu Dy CEM namar ki kyntait ban pdiang ïa ka jingïatai nia ba la wanrah da u MDC ka Resubelpara u Rinaldo Koksi Sangma halor ka jingdawa ban thaw noh da ka Electoral Roll ba thymmai tang na ka bynta ka GHADC khnang ba kiwei ki jaidbynriew kin ym ïoh ban ïashim bynta ha ka election.
Kane ka dei ka mat ba la dawa da ki Seng Bhalang bapher bapher jongka ri lum Garo hynrei kane ka jingleh jongkane ka EC jongka NPP ka la long thik kumba shet kylla ïa ka jaidbynriew Garo namar ka jingbym pdiang ban ïatai ban wanrah da kawei ka Electoral Roll ka buh ïa ka lawei ba dum ïa ki paid Garo ha ka ïing dorbar thawaiñ GHADC, ong ka GSU.
“ Ngi la dawa la slem bah ban thoh noh da kawei ka Electoral Roll tang na kabynta ka Election MDC sha ka GHADC hynrei la kyntait pynban da kane ka EC bad kane ka long kum ka jingshet kylla ïa ka jaidbynriew A’chik baroh kawei”. og u Zikku Balgra N Marak President ka GSU seng kmie.
Ka GSU ka pynrem jur ïa kane ka jingleh jongkane ka EC ban kyntait ïa kane ka mat kaba donkam tam jong ki paid Garo namar ka jingkwah ban wanrah la ka jongka Electoral Roll ha District Council ka long ban ïoh ïashim bynta tang ki paid A’chik ha ka Election MDC ym ban ïakhleh lang bad kiwei ki jaidbynriew namar ki District Council ki dei kiba la thaw kyrpang ban ïada ïa ki Riti ki Dustur jong ki Jaidbynriew trai ri rit paid.
Na ka liang u President ka NAS u Tengrak Marak ula ong “ Haka jingshisha ka jingdawa ïa ka Electoral Roll na ka bynta ka election MDC ka long ban ïada ïa ki jaidbynriew A’chik hynrei kane ka jingleh jongkane ka EC ka buh ïa ka jaidbynriew haka jingma ha ki por ki ban sa wan”
Kane ka dei ka mat ba kongsan tam ba baroh ki MDC ki dei ban ïashim bynta lang namar ka GHADC ka dei kaba la mang kyrpang na ka bynta ki paid Garo kat kum ka Paragraph 2 jongka Sixth Schedule. Dei lyngba kane ka Electoral Roll ba lah ban ïoh ïashim bynta tang ki paid Garo ban ïa thep vote bad ban ïakhun ïa ka election ruh. Hynrei la kyntait pynban ïa kane da ka NPP. “ ïa kiba kum kine ki nongïalam ba shet kylla ïa ka jaidbynriew dei ban bret noh shabar ki paid Garo bad ban da dei ba ïoh lad la dei ban leit rung hapoh ïing dorbar bad sei beit ïa kine ki nongialam shabar” ong u Tengrak.
“ Tangba wat la katta ruh kum ki seng bhalang ngim dei satia ban shongkli kti hynrei ngi dei ban ïaleh beit haduh ban da ïoh la ka jong ka Electoral Roll ha GHADC hapoh u ne u snem. Namar lada ngim ïoh ngin ym shongthait bad ngi kyntu ruh ïa ki MDC Garo kiba ieit jaidbynriew ba kin ym sangp jar hynrei ban ïasaid beit hapoh ïing dorbar haduh ban da ïoh la ka jong ka Electoral Roll” pynkut u Tengrak.
