Nongstoiñ: Ha ka taïew ba la dep ki nongïalam jong ka Federation of Khasi Jaiñtia and Garo People Rambrai circle, ki la hiar sha ka shnong Mawbuhtraw ban pynlong ïa ka jingïalang bad ki samla jong ki shnong kiba don ha katei ka thaiñ. Ha katei ka sngi la pynlong ïa ka jingïalang ha ka ïing dorbar jong katei ka shnong, ha kaba la pynïaid da u bah Planding Mawlieh Agricultural secretary jong ka FKJGP Rambrai circle, ha ryngkat ka jingïadon lang jong ki nongïalam ba hakhmat jong ka seng ki riew rangbah jong ka shnong ryngkat bad ki samla kiba la wan pynïasoh kum ki dkhot ba thymmai sha ka seng.
Ki nongkren ba kongsan ha katei ka jingïalang ki long u bah Shanbor Nongphud General secretary, bah Robert Benison Wahlang Chief Organiser, bah S.Paliar Education secretary bad kiwei kiwei.
Kitei ki nongïalam ka seng haba ai jingkren ha katei ka sngi ki la pynshai ïa ki samla ba ka jingwan rung ha ka seng, kam mut satia ba kin long kiba riewspah ne ban shim kabu ha kino kino ki kam. Hynrei ka kamram jong ki nongïalam bad ki dkhot ka FKJGP ka long ban peitngor ïa ki jingeh ba ki paitbah ha ki shnong ki thaw ki ïakynduh kum ha ka roi ka par, ka shongsuk shong saiñ, ka bha ka miat bad ban peitngor ruh kumno ban khanglad ïa ki kam sniew kum ka jingdie kyiad beaiñ ka jingleh donbor ïa ki ba duk ba suk bad kiwei kiwei.
Ha kane ka sngi la jied ruh ïa ki nongkitkam jong ka Mawbuhtraw unit, ha kaba u President Bah Sphailin Lyngdoh, Vice president Trenly Lyngdoh, General secretary Laskupar Lyngkhoi, Assistant secretary Synshar Lyngdoh, Chief Organiser Buldingshon Mawtyllup bad kiwei kiwei.
