Ka lyer elekshon na bynta ka elekshon MLA 2023 ka la sdang ha ka jylla baroh kawei bad ha kine ki por ngin sa ïohi ba bun ki paidbah kin sa klet noh ïa ki kyndon aiñ ïada COVID namar la trei ka shongshit ïalap elekshon. Kumta naduh mynta ka la dei ka por ïa ka sorkar jylla ba kan tuklar noh mardor bad pynap da ki kyndon kiba kham pyrkhing khnang ba kan ym don satia kano kano ka jingsaphriang biang jong ka khlam sa shisien ha kane ka jylla.
Da kaba phai dien shwa ïa kaei kaba la jia ha kine ki arsnem ba ka Meghalaya ka ïakhun ïa kane ka khlam COVID, ngi sakhi ba ha ka kylla kaba nyngkong katei ka khlam i kumba ka ïaid lait na kane ka jylla hynrei khlem poi pyrkhat puk kumba shah hiar thma ka syllad. Kaba kham i tieng eh kadei hadien ka kylla kaba ar ba kane ka khlam ka syllad khlem map shuh ka la shu sar naphang la ka long ïa ki heprit haduh kiba dang khie samla bad wat haduh kiba la noh ka rta.
Kumba ha kum kane ka por ba ka jylla ka pynkhreh ban ïakhun bad ïada lypa sa ïa ka thma pyrshah ïa u Omicron, ka dei ka pali jong uwei pa uwei u nongshong shnong ba da lei lei ngim pat long satia ban kheiñsting la ka long ha ki jaka paidbah, ki iew ki hat lane wat ha ki jaka kynduh ba kham bun briew. Kine ki dei ki por ba kordor bha kaba ngi hap ban phikir katba katei ka khlam kam pat poi ha kane ka jylla.
Donkam ruh ïa ki kmie ki kpa ban long kiba phikir katba lah ïa ki khun ki kti kiba dang kham lung rta khamtam eh kito kiba hapoh 15 snem kiba ym pat lah ban shim ïa ka tika. Ki sngi kiba kham eh i kumba ki ap biang ban lyngshop ïa kane ka jylla ruh lada ka sorkar jylla ryngkat ki paidbah kim long kiba peitngor lypa katba dang biang ka por. Kum ki nongshong shnong kim dei ruh ban khein shngaiñ lane shlur biej ha kum kane ka por khlem da ïada ïalade haba ki leit jingleit shabar jong ka jylla namar khlem artatien shisien ba la mih shabar kan don beit ka jingïakynduh briew khamtam eh ha kito ki jylla ba utei u kynja khniang jingpang u la don.
Donkam ruh ïa kito kiba ju trei ha ki kam kiba ïadei bad ki briew kiba na shabar ka jylla la ka long ha ka khaii pateng ne kino kino ki kynja kam ba kin shim lang ïa ka jingkitkhlieh ban snohkti lang bad ki bor sorkar khlem da kiar ne ïaid lait ïa ki jaka test ba la buh kyrpang da ka sorkar haman la ki lad.
Kam don satia kano kano ka kam ka bym lah lada ki paidbah ki ai ka jingïatreilang bad ki bor sorkar, ki bor pynïaid shnong bad khamtam eh ban shim ïa ka jingkitkhlieh ban ym thok dalade ïalade na ka bynta ka jingshngaiñ jong ka imlang sahlang. Ka jingïada kaba pyrkhing kumba la maitphang da ka sorkar jylla kadei kaba kongsan bad donkam kyrkieh bha ha kum kane ka por khamtam eh haba ïadei bad ka jingthmu ban pyrkhing na man ki jaka rung sha kane ka jylla khnang ba kan ym don kano kano ka jinglait suk jong ki briew kiba wan rung shapoh ka jylla khlem da test ïalade ne pyntikna ba kim don satia ïa utei u khñiang jingpang.
