‘Lada jia kaei kaei kaba sngewsih ka ophis u DC bad ka Dalmia ki dei ban kitkhlieh’

Khliehriat Lber 30 : Ha kaba ïadei bad ka jingpyrshah jur ka Dorbar Shnong Thangskai ïaka jing wan pynpoi ñiut ka company Dalmia, ka Federation of Khasi, Jaitia and Garo People East Jaiñtia Hills District ka ai iaka jingiaroh ïa ka Dorbar Shnong bad kynnoh ruh ba ka Dalmia ka la shu ïuh roit ïaka Dorbar Shnong Thangskai.
Ka Seng ka pynrem jur ruh ïaka ophis u Deputy commissioner ka East Jaiñtia Hills District kaba leh bym suidñiew ïa ka jingujor ka Dorbar Shnong Thangskai bad ka bym shim khia satia halor ka ujor kaba iadei bad ka jing wan rah ñiut ka company Dalmia bad ong ba dei namar ka jingbym shim khia ka ophis u Deputy commissioner ba kan sa pynlong ïaka company Dalmia ba kan leh katba mon khlem kheiñ snep shuh ïaka Dorbar Shnong Thangskai.
Na ka liang ka Seng ruh ka pynkynmaw ba ka Dorbar Shnong Thangskai ka la dep mana ïa ka company Dalmia ban nym bret pathar ïa ki plastic, ki ñiut bad ki jaboh kaba long ka jingma kaba khraw ïa ka mariang bad khamtam ïa koit ka khiah jong ki briew ha ka ring bad pynhiar mynsiem.
“Kum ka Seng ngi sngew ban ong ba ki bor pyniaid ka Dalmia Cement Ltd ki la ïuhroit ïa ka shnong Thangskai kiba dei ki jaitbynriew jong ngi hi ha kaba ki trai ka Company kiba dei ruh ki bar Jylla ki la kheiñ dew thala bad leh katba mon ban pynsniew ïa ka mariang, buh jungma ïa ka koit ka khiah namar tang shu kut ka kam ki kin sa leit phai noh bad ieh tang ka jingjot bad ka jingma ïa ngi kum ki nongshong shnong khamtam ïa ka pateng ban wan” ong u kyrwoh na u General Secretary FKJGP East Jaiñtia Hills District u samla Deihok Sumer.
“Kumta ka la dei ka por kaba biang eh ban nym aili ïa ka Dalmia Cement Ltd bad ïa kiwei de ki Company ruh kumjuh ba kim dei ban shu leh katba ki mon namar ka long kum ka jingkheiñ poh ïa ka Dorbar Shnong, halor kane ka nongrim ka seng ka ai ka jingkyrshan kaba pura ïa ka Dorbar Shnong Thangskai ban leh da kaba tyngeh ïa ki bor nongpyniaid jong ka Dalmia Cement Ltd bad ka seng ka kren shai ba lada ka bor shnong ka donkam jingiarap ka seng ka la long kaba la kloi ban mih shakhmat ban kyrshan met bad mynsiem ïa ka Shnong Thangskai bad khamtam ki nongialam ka Dorbar Shnong, namar ki dkhot ka Shnong Thangskai ki dei ruh ki nongialam ka FKJGP East Jaintia Hills District Khliehriat.
Ka ong ba lada jia ka ei kaei kaba sniew ne ka jingjia ba sngewsih ïa ki bad ïa ki nongialam ka Shnong hi baroh ka wei ka seng ka kren shai ba ki bor nongpyniaid ka Dalmia Cement Ltd bad ka ophis u Deputy Commissioner East Jaintia Hills District ki dei ban shim ïa ka jingkitkhlieh” Pynkut u kyrwoh na ka seng.