Shillong, Nailur 12 : Ka sorkar jylla haduh mynta kam pat ïoh pdiang satia ïa kano kano ka jubab na ka sorkar pdeng haba ïadei bad ka Resolution ban pyntreikam noh ïa ka Inner Line Permit (ILP) ha ka jylla, pyntip u Myntri Rangbah ka jylla, Conrad K Sangma haba jubab ha Ïing Dorbar hynne ka sngi.
“Mynta kane ka kam ka don bad ka Ministry of Home Affairs ka sorkar pdeng, ngi hap ban ap ïa ka jingmynjur na ki,” ong u Myntri Rangbah haba jubab halor ka zero hour notice ba wanrah da u MLA ka Nongpoh, Bah Mayralborn Syiem ha ka Dorbar Synrai hynne ka sngi.
U Pyntip ruh ba ka sorkar jylla ka la dep ban phah ruh ïa ka dorkhas kynthup ïa ka ILP kum kawei na ki mat jingdawa jong ki sha u Myntri Kampohïing ka Ri, u Amit Shah ha ka jingwan jong u ha ka 23tarik u Rymphang jong u snem ba la dep.
“Ka Meghalaya baroh ka dang ap khmih lynti ïa ka jubab na ka sorkar pdeng halor kane ka bynta,” u la ong.
U Myntri Rangbah u la ong ruh ba ïa ka jingshimkhia jong ka sorkar MDA ka la paw da kaba mynjur ïa ka Resolution ha ka 19tarik u Nohprah 2019 hadien ba ka la don ka jingdawa kaba jur ban pyntreikam noh ïa ka ILP. U la ïathuh ba ïa ka Resolution ki la phah sha ka MHA ha ka 23tarik u Nohprah 2019 bad ka sorkar ruh sa shisien ka la pynkynmaw biang ïa ka MHA lyngba ka shithi ba ki phah ha ka 17tarik u Naiwieng, 2020.
U Conrad u la ong ruh ba ka jingdawa ban pyntreikam ïa ka ILP ka la nang jur nang jur hadien ka jingpyntreikam ïa ka Citizenship Amendment Act (CAA) bad ki sengbhalang bapher bapher ki la leit ban pynlong jingïalang kylleng ka jylla ban pynpaw ïa ka jingsngew halor ka jingbym pyntreikam ïa ka ILP ha ka jylla.
U la pyntip ruh ba ka kynhun ki MLA ruh ki la kynduh ïa u Myntri Kampohïing ka Ri ha New Delhi ha ka 20tarik u Rymphang 2020 bad la pyntip ruh ïa ki ba ka sorkar pdeng ka dang bishar bniah ïa ka Resolution ba la mynjur da ka Ïing Dorbar Thawain ka jylla.
