Shillong, Nailur 12 : U Lamphang ka ïing dorbar thawaiñ ka jylla u bah Metbah Lyngdoh mynta ka sngi u la weng noh ïa ki kyntien ba la pyndonkam da u MLA ka Gambegre u Saleng A Sangma ha ka por jongka jingïatai nia namar ki dei ki kyntien kiba long khlem akor ba kiba ym ju pyndonkam hapoh ka ïing dorbar ne “unparliamentary word”.
Kumta ïa katei ka kyntien la weng noh na ka jingbuh record ïa ki jingïakren hapoh ka ïing dorbar. U Saleng ula ïashim bynta ha ka jingïatai nia halor ka jingsniew ki surok, ka jingbym biang ka rukom pynïaid ïaki kali bad ka jingbym bat ïaki kyndon aiñ ba la pynmih da ka tnad transport. ïa kane ka mat jingïakren la warnah da u MLA ka Umroi bad Chief Whip ka Liang Pyrshah u bah George B Lyngdoh.
U Lamphang u la pynkynmaw ruh ïa baroh ki dkhot hadien ba u la ïohi ba kiba bun haba ki kren ne pan jingpynshai na u myntri ki phai khmat beit sha uta u myntri ne dkhot jong ka ïing dorbar hynrei kim dei ban leh kumne ki dei ban phai khmat beit sha ka shuki u Lamphang. Kumta u la kyntu ïa baroh ki dkhot ban kynmaw ïa kane namar ka dei ka rukom pynïaid hapoh ka ïing dorbar.
