Ïeng skhem ka KHADC ban ym pdiang ïa ka rai pyntreikam ka sorkar ïa ka CrPC bad CPC

Shillong, Nailur 12: Ki MDC jong ka KHADC ha ka sngi Nyngkong da kawei ka sur ki la rai ban ym pdiang ïa ka rai ka sorkar ban pyntreikam ïa ka aiñ CrPC bad CPC ha ki Kashari ba hap hapoh ka jingpeit jingkhmih ka KHADC ne ki Kashari ba ïoh bor ban tian bishar na ka Khyrnit ba Hynriew ka Riti Synshar ka ri ïathuh u Bah Titos Chyne CEM ka KHADC hadien ba la wai ka jingïalang jong baroh ki MDC ban ïatai ïa kane ka mat.
Haba kren sha ki lad pathai khubor u Bah Titos u la ong ba kumba la ïeng naduh kaba sdang ba ka KHADC kan ym pdiang ïa kane ka rai ka sorkar namar kane kan pynduh bor ïa ki Kashari District Council bad ki Kashari Shnong, Raid bad Hima kiba la shim bishar naduh ki snem kiba mynshuwa eh.
“Lada phi peit na ka notification ba la pynmih ka ka sorkar ka la ong ba ki Kashari Distric Council kin bteng ban treikam kumba ki ju leh baroh shikatta kat kum ka bor ba la pynkup lyngba ka Para 4 bad 5 ka 6th Scheduled katba ha ka juh ka notification ka ong ba kane ka kyndon aiñ CrPC bad CPC kin treikam ha baroh ki Kashari ba don ha ka jylla bad kane hi ka jingpynbna ka sorkar ka dei beit ban pynduh bor ïa ka District Council” ong u Bah Titos
U Bah Titos u la ong ruh ba na ka liang jong ki MDC kin sa leit ban ïa kynduh bad u Myntri Rangbah ka jylla ban ïakren bad u halor ka jingtyngkhuh kane ka hukum ka sorkar bad ka Khyrnit ba Hynriew kiba la ai bor ïa ki Kashari district Council ban bishar.
U la ïathuh ruh ba na ka liang ka Council kan sa leit ban ïakren bad u Lat ka jylla namar kane ka hukum ka sorkar kan don ka jingïatyngkhuh hapdeng ki kyndon ka riti synshar ba aibor ïa ka District Council bad kumjuh ka kyndon ba aibor ïa ka sorkar jylla.
“Ka jingthmu ban leit ïa kynduh jong ngi bad u Lat ka long namar kane ka hukum ka sorkar ka tyngkhuh hapdeng ki ar tylli ki bor ba la pynkupbor hi da ka Riti Synshar ka ri India” u la ong
Shuh shuh u la ïathuh ba na ka liang ka KHADC kan sa khot ïa ka jingïalang ïa ki khlieh nongsynshar kiba don ki Kashari ha ka jylli synshar ka jong ki. U la bynrap ruh ba na ka liang jong u u la ïakren bad u CEM jong ka JHADC bad GHADC bad na ka liang jong ki ruh ki pynpaw ïa ka juh ka jingsngew kum ka KHADC
Haba jubab la kane ka jingpynbna ka sorkar kan khring ïa ka Para 12 AA ka 6th Scheduled bad kan pynduh bor syndon ïa ki Kashari District Council bad jong ki Shnong, Raid bad Hima u Bah Titos u la ong kan ym don kaba kum kata namar kane kaba ka sorkar ka wanrah ka dei tang ka Notification ym satia ka Act.