Khliehriat, Nailur 11: Ha ka jingïalang ba la pynlong hynnin ka sngi ha Ladrymbai Dongwah, ka National People’s Party East Jaiñtia Hills District ka la pdiang burom ïa ka President barim jong ka Mahila Congress Cmmittee, ka kong Jhanika Siangshai lem bad ki 48 ngut ki paralok jong ka kiba la wan ban pynïasoh bad ka party NPP.
Ki nongïalam jong ka party NPP na East Jaiñtia Hills District, ki la pynpaw ka jingsngew kmen ban ïohi ba ki la bun ki kynthei bad ki long kmie ruh kiba la mih sha khmat ban wan pynïasoh bad ka party bad ong ba katno ka long kaba i shngaiñ bad kaba i don jingkyrmen haba ïohi ïa ki rangbah bad ki longkmie kiba la wan ban ai shuh shuh ïa ka jingkyrshan ïa u kyrtong ka NPP, u bah Nehlang Lyngdoh u ban ïakhun ïa ka election MLA ka ban long ha u snem 2023 na ka 6- Khliehriat Constituency bad mynta ka party ka la nang kiew shuh shuh na uwei u maw jam sha uwei pat bad khmih lynti ba ka NPP na East Jaiñtia Hills District kan poi sha ka thong ban kheit ïa u soh ka jingjop.
Ka President ba rim jong ka Mhila Congress Committee kaba la shah jied mynta kum ka President East Jaiñtia National Party Women’s Wing, ka kong Jhanika Siangshai, ka la pynpaw ba ka daw ka jingmih noh jong ka lem bad ki paralok na ka part ka dei namar ba ka party Congress kam don kyrtong na ka 6-Khliehriat Constituency ka la bynrap ruh da kaba ong “Kum ki dkhot ba thymmai jong ka party NPP ma nga bad kine ki paralok ngi kular ba ngin ïai neh skhem ha kane ka party bad ngin nang ïai suh thied ban long kum kita ki kynthei ki ban ïai pynsaphriang ïa ka jingiwbih sha baroh ki jaka haduh ban da poi sha ka thong”
Ka kong Siangshai, ka la pynpaw ruh ka jingsngew khia halor ka jingshah kynthoh kaba la mih na kawei pat ka party ka bym kwah ban pynpaw, ha kaba uta uba kren u la kynthoh da kaba ong ba ki kynthei ki hap ban pyn bhabriew bha ïalade, te ka kong J. Siangshai, kum ka kynthei ka don ka jingsngew ba kumno yn pynbha briew haba ym lah kot ka bor ha ka ïoh ka kot, kumta ka la pynpaw bad ong ba “Ka jingbhabriew kaba shisha dei ka jingieid, ka akor ka burom, namar kan poi ka por ba ka dur bha briew kan sa duh noh ynda la tymmen, hynrei ka jingbhabriew ka dohnud ka long kaba donkam tam ka ba ïai neh shi jingim”
Ha kajuh ka por, ka kong Jhanika lem bad ki paralok, ki la kut jingmut ba kin trei shitom ban kyntiew ïa ka NPP bad ruh ban wanrah ïa ka roi ka kiew, ka bha ka miat ha ka imlang ka sahlang da ka jingïaid lynti kaba ryngkat-ryngkat bad ki nongïalam ba rangbah jong ka party.
U District President NPP East Jaiñtia Hills District, u Dr John Dkhar, u la ai ka jingkren pdiang sngewbha ïa ka kong Jhankia Saingshai bad ki paralok jong ka bad ha kajuh ka por u la kyntu lang ïa baroh ban trei shitom ban poi sha ka thong ban pynlong ïa u bah Nehlang Lyngdoh uta u kyrtong u ban jop donburom na ka 6- Khliehriat Constituency.
Kiba la ai jingkren ki kynthup ruh u General Secretary NPP6- Khliehriat Block Committee, u bah Iasyllokki Lyngdoh, u Adviser, u bah Heibormiki Shylla, General Secretary NPYF Khliehriat Block, u bah R.Swer, ka ong Bashaimon Rymbai bad kiwei kiwei bad ïa ka jingïalang la pynïaid da u Vice Presidnet jong ki Block Committee, uba dei ruh u MDC ba rim, u bah J.R.Pyrtuh.
