Khliehriat, Nailur 11 : Ki nongkyrshan jong u bah Justine Dkhar, u MLA ba rim jong ka Khliehriat Constituency, mynta ka sngi ki la ïakynduh lang ha ka jingïalang ba la pynlong ha East Side Inn Hotel, Ladrymbai Bypass, Jalyiah, ha kaba utei u MLA ba rim ruh u la ïa don ryngkat lang bad ki paidbah bad dei lyngba ka jingkyntu ki nongkyrshan kiba ju kyrshan ïa u utei u MLA ba rim jong ka Khliehriat Constituency u la pdiang bad mynjur ba ha kane ka kynti un ai ka jingkyrshan ïa u kyrtong ka UDP u bah Kyrmen Shylla uba dang bat ruh mynta kum u myntri ka sorkar jylla.
Ha kane ka jingïalang u bah Justine Dkhar u la pynpbna ruh sha ki nongkyrshan jong u ba na ka daw ka jingbym don ka met kaba koit ba khiah u la hap ban sangeh noh ïa ban ïa ai reng ha ka election ha u snem 2023 bad khlem da ïaid lait na ki paidbah kiba ju ieid bad kyrshan ïa u naduh ki por ba u dang ïa ai reng, u bah Justine u la pan ïa ka rai jong ki ha kaba ki nongkyrshan jong u ruh ki la kyntu bad kyrpad ïa u ba u ruh un ïa mynjur lem noh bad ki ban ïa kyrshan lang noh ïa u bah Kyrmen Shylla ha kane ka MLA election ka ban sa long ha u snem 2023.
“Nga sngew nguh ïa ki nongkyrshan jong nga kiba la wan sha ka jingïalang, kiba ju kyrshan met bad mynsiem ïa nga ha baroh ar tylli ki election kiba nga la ïa ai reng bad hadien ba nga la iohsngew bad sngap ïa ki jingai jingmut jongki baroh ha kaba ki la kwah ruh ïa nga ban kyrshan ïa u kyrtong jong ka UDP, kumta nga ruh nga la mynjur bad shim ïa ka rai mynta ka sngi ba ngan ai ka jingkyrshan kaba pura ïa u kyrtong jong ka UDP” ong u bah Justine Dkhar bad u la pynshai shuh shuh ba um pat shim pat ïa ka rai ban long kum u dkhot jong ka United Democratic Party bad um nym treh hi ruh ban long u dkhot ka UDP ha kaba ïadei bad ka jinglong dkhot un sa pyrkhat pat ïa kane hadien ba la dep ka election.
U bah Mehi Rymbai, uba na ka shnong Moolang, u la ong ba kawei kaba pynlyngoh ïa ki paidbah ka long ba u bah Nehlang Lyngdoh uba dei u MLA ba rim uba ki paidbah ki la ieid bad shaniah bha ïa u kum u nongmihkhmat, hynrei u la shu iehnoh jyndat ïa ka kam shakri paidbah khlem da pyntip bad khlem kano kano ka jingpynshai ïa ki paidbah kiba ju kyrshan ïa u, kane ka jingleh u bah Nehlang Lyngdoh ka la pynlong ïa kiba bun ki nongkyrshan jong u ba kin duh noh ïa ka jingshaniah, kumta, kum u samla uba ju kyrshan ïa u bah Justine Dkhar, u la kyrpad ba lada long kaba lah ha kane ka kynti lah dei ban ïa kyrshan lang noh ïa u bah kyrmen Shylla uba dei u kyrtong ka UDP na ka 6-Khliehriat Constituency.
Ha kajuh ka por, u Waheh Shnong Wapungskur, u bah Deolangki Dkhar, u Waheh Shnong Wapung Shnong, u bah Kduplang Ryngkhlem, Waheh Shnong Mukhaialong, u bah Hundred Phawa, waheh Shnong, Pamra Paithlu, u bah Loving Chyrmang, ki MDC barim ba kynthup u bah Helping Phawa, u bah Sevenborn Dkhar, u samla ba ju trei mon sngewbha, u bah M.H.Dkhar, na shnong Wapung bad kiwei kiwei ki riew rangbah kiba na ki shnong bapher bapher jong ka 6-Khliehriat Constituency, kiba ju long ki nongkyrshan ba radbah jong u MLA ba rim, kiba la ai jingkren ha ka jingïalang bad ki la kyntu ruh ïa u bah Justine Dkhar ba u ruh un sngewbha ban ai lem noh ïa ka jingkyrshan ïa u bah Kyrmen Shylla.
Da ka jingkmen bad jingïa mynjur lang kawei ka jingmut ki nongkyrshan jong u MLA ba rim ka Khliehriat Constituency lem bad u bah Justine Dkhar ki la Rai ban kyrshan ïa u bah Kyrmen Shylla.
Kiba la ïa poi lang sha kane ka jingïalang kiba don haduh kumba phra spah ngut tam, ki la sngew hun ban iohsngew ba u bah Justine Dkhar ruh u la pdiang ïa ka jingkyrpad bad jingkyntu jong ki bad da kawei ka jingmut ki la rai ba kin kyrshan ïa u bah Kyrmen Shylla.
Na ka liang u bah Justine Dkhar ruh, u la kyntu ïa ki paidbah kiba la ïa poi sha kane ka jingïalang ba ki dei ruh ban sdang noh ban trei shitom ban wanrah ïa ka jingjop ka UDP na Khliehriat Constituency namar kumba la rai ban ai ka jingkyrshan donkam ruh ban trei shitom ban ïa poi sha ka thong ka jingjop.
