Khliehriat, Nailur 7: Ki khynnah pule kiba pule ha ki skul miet ba la pynïaid da ka Bosco Integrated Development Society hynnin ka sngi ki la rakhe ïa ka sngi burom ki nonghikai ha shnong Lumshyrmit bad ha kajuh ka por kane ka jingrakhe ka dei ruh kum shi bynta ka jingrakhe ïa ka International Litteracy day kaba ju pynlong ha ka 8 tarik u nailur man la u snem.
Ha kane ka sngi u Deputy CEM jing ka Jaiñtia Hills Autonomous District Council u bah Lasky Rymbai u la wan ban long kum u kongsan bad u la pynlut por ban iakmen lang bad ki khynnah pule jong ka BIDS ha shnong Lumshyrmit.
Ïa kane ka rakhe ba la pynlonga ha shnong Lumshyrmit la ïa wan ban ïa shimbynta lang da ki khynnah skul jong ka BIDS kiba na ki khyndai tylli ki shnong, ba kynthup ki khynnah kiba na Moosniang jongdeng, Moosniang Rim, Rangad, Moonongtdu, Lumputhoi, Cham Cham, Mutong, Mulang bad Lumshyrmit.
Ka tei ka sngi ki khynnah ki la rah ruh ïa ki placard kiba pyni ïa ka jingkordor ka jingnang jingstad bad thoh ruh ba ka jingnang jingstad ka dei ruh ka atiar kaba don bor.
Na ka liang u Coodinator jong ka BIDS, u bah Barister Suchen lem bad ki field supervisor ba kynthup i kong Bashisha Thoo, u bah Shaphrang Masar, i kong Therisia Kyndiat bad i kong lekiroi Papeng, ki la ïathuh ba ki khynnah skul jong ka BIDS ki la dap da ka jingsngew kmen bad ki la ïa shim bynta ruh da ka jingkmen ha kane ka jingrakhe ïa ka sngi burom ki nonghikai.
Kum ban shu bynrap ka Bosco Integearted Development Society (BIDS) ka dei kaba la bei tyngka da ka Child Aid Network na ri Germany kaba long kum ka mission ne ka shlem ban ïarap ïa kito ki khynnah ba kin ioh ïa ka jingnang jingstad, kumta ha kine ki skul miet jong ka BIDS kiba wan ban pule ki dei kito ki khynnah kiba na ka longiïng kaba duk, ha kaba ha ka por mynsngi ki ju leit sha ki jingbylla, don ruh ki khynnah kiba ju leit ap masi sha lum ha ka por mynsngi bad ha ka por jan miet pat ki ju wan sha ki skul ba la pynlong da ka BIDS.
Ka jingdon kine ki skul miet jong ka BIDS ki la long ka jingmyntoi kaba khraw ha East Jaiñtia Hills District ha kaba kyntiew ïa ka stad ka tip bad ban wanrah pat ïa kito ki khynnah kiba la pep skul noh shiteng por, lah ban ong ruh ba kane ka mission jong ka BIDS kan ïarap ban pynhiar ïa ka percentage jong kiba pep skul noh tang shiteng por.
