Yn lum ïa ki Khlieh Nongsynshar Block I bad II
Shwa ban sdang ka jingpynbeit pud ba ar
Shillong, Nailur 5 : Ka sorkar kan sa lum ia ki Khlieh Nongsynshar na Block I bad II hadien ba la dep thaw ïa ki Regional Committee bad shwa ban sdang ka jingïakren ïa pynbeit pud ha kane ka wat ka Ba Ar, ong u Symbud Myntri Rangbah bah Prestone Tynsong.
ïa kane u Symbud Myntri Rangbah ula kular ha ki Khlieh Nongsynshar Block I kiba la wan ïa kynduh ïa u mynta ka sngi. Haba kren sha ki lad pathai khubor hadien ba la dep ïakynduh ïa ki nongïalam na Block I u bah Prestone u la ong ba kine ki nongïalam ki la ai da ka jingthoh sha u ha kaba ki la kyrpad ïa ka sorkar ban wan rah biang ïa ki 36 tylli ki shnong Pnar kiba hap ha ka Block I sha Meghalaya.
“ Nga la batai bha ïak i ba kin sngewbha ban ïai ap haduh ban da dep thung iaka Regional Committe bad hadien kata yn sa khot ïa ki ban ïakren sani bha ryngkat ki kot ki sla kiba biang namar na ka liang u Myntri Rangbah ka jylla u Conrad K Sangma bad u Myntri Rangbah ka Assam u Himanta Biswa Sarma ki la dep ïa rai ban thung ïa kine ki Committee hapoh 15 sngi.” ong u bah Prestone.
Kumta mynta ka shong ha kine arngut lano kin pynmih ïa ka jingpynbna halor kine ki Regional Committee ong biang u Symbud Myntri Rangbah.
Na ka liang u General Secretary ka Labang Nangphyllut Pangam Raliang Council u bah M.M Thaiang u la ong ia kine ki 36 tylli ki shnong ha Block I la pynïasoh jubor sha ka Karbi ANglong, Mikir bad North Kachar Hills ha u snem 1951. Ka jingshisha ka long ba kine baroh ki shnong ki dei hapoh ka Jaintia HIlls.
“Halor kine ki jingshisha ngi la wan ban ïa kynduh ïa u Symbud Myntri Rangbah ba un shim khia ba baroh kine ki shnong ki dei ban wan phai biang sha Meghalaya ha kane ka jingïakren ïa pynbeit pud ha ka wat ka Ba Ar ong u ma Thaiang.
“ Ngi ngeit skhem ruh ba ka Assam ruh kan pyllait da kaba suk ïa baroh kine ki shnong ba sah ki Pnar ban leit phai sha Jaintia Hills” ong u ma Thaiang.
U la pynpaw ruh ka jingkyrmen skhem ba kane ka sorkar MDA hapoh ka jingïalam u Myntri Rangbah u Conrad K Sanma kin lah ban pynbeit ïa kane ka kam kaba dang sah kumba la thrang lut da ki paidbah.