Shillong, Nailur 4 : Wat hadien ba la shah kem bad shah pharep u Vice President ka BJP u Bernard Marak uba dei u MDC ka Tura bad shah pynngat ruh ha kiba bun ki kyndon aiñ ka BJP kam pat weng satia ïa u na katei ka shuki namar u National Vice President ka BJP u Dr Chuba Ao u la ong ba ym pat leh namar kane ka kam ka dang don ha ka ïing bishar.
“ Ngim pat weng ïa u na ka shuki Vice President namar kane ka kam ka dang don ha ka ïing bishar. Kat haduh mynta ka ïing bishar ka dang bishar ïa kane ka jingkynnoh bad pynngat kyndon ïa u Bernard kumta ai ba ka ïing bishar kan ai ïa ka jingbishar ba hok bad hadien kane ngin sa peit aiu ngin leh” ong u Dr Ao.
U la ong “ Ngi na ka BJP ruh ngi dawa ba dei ban thung da ka jingtohkit ba laitluid khnang ban lap ïa ki jingshisha baroh”.
u la ong ba ki bor jongka aiñ kim dei ban leh shilliang khmat satia, hynrei wat la katta ruh haba ki don ha ka shuki la shu khyrwait shabi pat ïa ki katba mon da kita kiba halor jongki. U la ïathuh na ka liang ka party ruh ki la pyrshang ban wad ïa ki jingshisha halor kane ka jingshah kem jongu Bernard bad na kata ka daw ka BJP ka shaniah ha ka jingbishar ba hok ka ïing bishar.
ïa u Bernard la kem halor ka nongrim ba u pynkylla ïa ka Rimpu Bagan kum ka brothel namar ki pulit ki la ïoh ïa ki sabut bad kem ruh ïa bun ngut ki kynthei na katei ka jaka da kaba la kynnoh ba ki leh ïa ki kam awria. Nalor kane ki pulit ki la ïoh ruh ban pyllait im ïa lai ngut ki khynnah rit kawei ka kynthei bad arngut ki shynrang. La ïoh ruh ban kurup bun spah tylli ki condom na katei ka jaka. Bun ruh kiwei ki sabut ba ki pulit ki la ïoh lum na katei ka ïing basa Rimpu Bagan.
