Syrtok ki paidbah ka shnong Mawdun ba shu ieh shrah ka PWD ïa ka surok

Shillong, Nailur, 03 : Ki nongshong shnong jong ka shnong Mawdun, ka shnong kaba don harud ka Pung Umïam, ki la mad jingeh ha ka leit ka wan bad ka rah ka rong naba ka surok kaba pynïasoh naduh Mawlai Umthlong ter ter shaduh ka shnong Mawdun haduh ka shnong Nongpathaw ka la jot rathai na ka daw ka jingbym maramot jong ka tnat PWD ïa kane ka surok.
Ki nongshong shnong jong ka shnong Mawdun ki don tang kane kawei ka surok ban wan sha nongbah Shillong haba donkam ban leit thied marbam bad ban kit ïa ki nongpang. Hynrei ka jingsniew shaba palat jong kane ka surok kaba la jot rathai ka la buh jingeh haduh katta katta ïa ki paidbah nongshong shnong kiba la ïakynduh mawsiang ha ka leit ka wan.
Ki nongïalam jong ka Hynñiewtrep National Youth Front (HNYF) East Khasi Hills District lem bad ki nongmihkhmat na ka Diengiei Dorbar Pyllun bad ki nongshong shnong jong ka shnong Mawdun bad ka shnong Mawmih ha ka sngi Thohdieng ki la hiar jurip ïa kane surok kaba la jot rathai bad kaba don ruh ki bynta ba la twa ynda la poi ha lad Mawdun.
Ka jingleit jurip jong kine ki kynhun ïa kane ka surok ka long hadien ba ka tnat PWD (R) kam shym la shimkhia satia wat hadien ba ka seng HNYF ka la dawa ba dei ban siang rong noh ïa kane ka surok kaba la pynsuhsat haduh katta katta ïa ka leit ka wan jong ki paidbah kiba shong basah ha ka shnong Mawdun.
U President ka HNYF-EKH u Bah Bless Dkhar ha ka jingïakren bad ki lad pathai khubor u la ïathuh ba ka Seng ka la ïakynduh ïa u Executive Engineer ka tnat PWD (R) ha kaba la kyntu ïa u Kontraktor ban pynkhuid noh ïa ka khyndew kaba la kah lynti ïa ka surok kaba la ktah ïa ka leit ka wan.
U la ong ruh ba lada ka tnat PWD (R) ka dang pynslem ban pynkhuid ïa ka jingtwa khlempep kane kan ktah ïa ki paidbah bad ïa ki nongshong shnong lada donkam ban pynkit ïa ki nongpang ha ka miet ka iong.
U la ïathuh ba la don ar bnai kynthih ba la kyntu ïa ka tnat PWD (R) ban pynkhuid ïa ka jingtwa khyndew hynrei ha kane ka jingjurip la shem ba kane ka tnat treikam jong ka Sorkar kam shym la leh eiei halor ka jingud jingnam jong ki paidbah.
“Ngi la ïoh ka jingujor na ki paidbah ka thaiñ Diengiei bad ngi da sngewsih haduh katta katta ba ka tnat PWD (R) kam shym la shimkhia ban bthah ïa u Kontraktor ban pynkhuid ïa ka khyndew ba la twa kaba la kah ïa ka surok,” u la ong.
Une u nongïalam ka HNYF u la ong ruh ba ka Seng kam don lad shuh da kumwei pat hynrei ka kyrpad ïa ka tnat PWD (R) bad ïa u MLA jong ka thaiñ ban shimkhia lem ïa kane ka jingeh kaba ki paidbah ki la mad.
“Ngi kwah ban ai por khatduh ïa ka tnat PWD (R) ba ka dei ban siang rong noh ïa kane ka surok shwa ka Khristmas namarba kane ka surok ka dei kaba pynsuk ïa ki paidbah ha ka leit ka wan bad kane ka jingleh mynthi jong ka tnat PWD (R) ka la pynduh jingkyrmen ïa ki paidbah jong ka shnong Mawdun,” u la bynrap.
“Ka seng ka kwah ban ïoh ïa ka jingïatreilang hynrei lada ka jingdawa kam urlong, ka seng kam banse ban leit ujor sha ka Disaster Management. Ngi dawa ruh ïa u Kontraktor ba u dei ban shna pyndep noh ïa kane ka surok namarba ïa ka work order ladep pyllait,” u la ong.
U la ïathuh ba kane ka jingjurip ka dei ka sien kaba ar hadien ba la ïoh ujor. Ha ka jingjurip ha ka sien banyngkong, u la ïathuh, la ïadonlang naduh u Executive Engineer, u Superintendent Engineer, u Sub-divisional Officer ka tnat PWD lem bad u Kontraktor hynrei kane ka jingjurip ka shu long pynban tang ka kam kai namarba haduh mynta ym shym la shna pynbha ïa ka surok bad ym shym la khat satia ïa ka khyndew kaba la twa kaba la pynthud ïa ka leit ka wan jong ki paidbah.