Shillong, Nailur, 03: Ka Federation of Khasi Jaiñtia and Garo People (FKJGP) lyngba ka education cell ha ka sngi Thohdieng ka la leit ban ïakynduh ïa ki bor badei khmih jong ka tnad pule aiñ(Law) ka skulbah North Eastern Hill University (NEHU) halor ka jingïoh jingujor na ki kmie ki kpa bad ki samla pule ïa ka jingbym don ki nonghikai kiba hikai ha katei ka tnad pule mynta la katto katne por.
Na ka liang ka FKJGP kala buh por 10 sngi ïa ki bor badei khmih ïa ka NEHU ba kidei ban thung nonghikai noh ha kane tnat pule lem kumta ka seng kan shim da kiwei ki sienjam.
U Assistant Education Secretary Bah Gabriel Sun, haba kren sha ki lad pathai khubor u la ong ba ka seng ka la ïakynduh bad buh da ka dorkhas hakhmat u Pro Vice Chancellor ka NEHU Prof Henry Lamin, Registrar Prof S K Dixit bad u Head of Department ka Tnad Law, Chintamani Raut ban pynbeit ïa kane ka kam.
U Bah Gabriel ula ong ba ka jingduna jong ki nonghikai ka la ktah jur ïa ki samla pule khamtam ha ka ban pyndep ïa ka course jingpule bad dei namar kata ka seng kala dawa na ka NEHU ban leh eiei ïa kane ka kam na ka bynta ka bha ka miat ki samla pule.
Ha kaba ïadei bad kane, u nongïalam ka FKJGP ula ong ba na ka liang u Pro Vice Chancellor ka NEHU ula pyntip ba ka Skulbah ka dang pynkhreh mynta ban shu thung shipor ïa ki nonghikai ha ki kam ba lait jong kane ka tnat pule. U la ong ba na ka liang u Pro Vice Chancellor jong ka NEHU u la kular ba kane ka jingthungkam ïa ki nonghikai yn sa pyndep noh hapoh ka 10 sngi.
