Khliehria Nailur 2: Ka public hearing lane ka jingpynsngew paidbah ha kaba ïadei bad ka jingthmu ban pyntrei ïa ki ar tylli ki par mawshun kiba don ha Lumshnong ba la pynlong mynta ka sngi ka la ïaid beit khlem kano kano ka jingpyrshah, kitei ki par marshun ki dei kiba la long trai da u bah Lamshwa Kyndoh bad u bah Tenson Dkhar kiba na shnong Lumshnong.
U Environmental Engineer jong ka tnat Meghalaya State Pollution Control Board, u bah S.Syiem u la pynsgew ba Ka par mawshun jong kitei ki ar ngut ki dei kiba ha ka jingheh kaba 1.07 hecter bad 2.4 hecter bad ka dei kaba hapoh 500 miter ka jingjngai kawei na kawei, la ong ba kitei ki ar ngut ki la aplai ban ïoh tih mawshun bad ki la ïoh ïa ki jingdonkam ha kaba ïadei bad ki kot ki sla bad la donkam ban pynlong ïa ka jingpynsgew paidbah kaba la pynlong mynta ka sngi ha shnong Lumshnong.
Ïa ka public hearing la pynïaid da ka ophis jong u Deputy Commissioner ka East Jaiñtia Hills District ha kaba u Additional Deputy Commissioner u bah G.Warjri, MCS u la long kum u shnongknor ha ka jingïalang ha ka jingïa don ryngkat lang ki heh na ka tnat Meghalaya State Pollution Control Board, u Extra Assistant Commissioner ka East Jaiñtia Hills District u bah S.Marwein, ki trai par, ki nongïalam bad ki dkhot jong ka East Jaiñtia Mineral and Traders Association, ki nongialam bad ki dkhot jong ka East Jaiñtia Mineral and Supplier Exporter and Importer Association, u Waheh Shnong Lumshnong, u bah Monlang Ladong, ki paidbah lem bad kiwei kiwei ki riew rangbah jong ka thaiñ.
U President jong ka East Jaiñtia Mineral and Supplier Exporter and Importer Association,u bah Wanshwa Nongtdu, u la pynsngew ïa ka kaiphot jong ki jingkular jong ki ar ngut ki trai par kiba kynthup u bah Lamshwa Kyndoh bad u bah Tenson Dkhar.
Katkum ka jingpynsngew na u bah Wanshwa Nongtdu, la ong ba kitei ki ar ngut ki trai par ki ban sa pyntrei ïa ki par mawshun, ki la kular ba kin ïaid katkum ki kyndon ki ban ïada ïa ka mariang bad ki ban wanrah ïa ka mariang kaba khuid bad kaba koit ka khiah ka ban nym ktah ïa ki paidbah jong ka thaiñ, la ong ba ki la kular ruh ban thung ïa ki dieng ki siej, ban ker ïa ka jaka ba don ki par mawshun, ym tang katta ki la kular ruh ba kane ka long ruh ka lad ai kam ai jam ïa ki paidbah ha kaba yn sa ai ruh ïa ki jinghikai ïa ki nongtrei ha kata ka rukom ba kin pyntrei ïa ki par da ki kor ki bor jong ka juk ba mynta.
Ki kor ki bor ki ban buh ha ki par mawshun ki long ki ban nym pynmih than ïa ka jingsawa ki ban pynwit ne pynthut ïa ki paidbah, ki trai mawshun ki kular ruh ban buh ïa ki medical camp na ka bynta ki nongtrei bad na ka bynta ki paidbah jong ka thaiñ, ki kular ruh ban long phikir bha ha kaba ïadei bad ka koit ka khiah jong ki paidbah. Ki la kular ba ki buh ïa ki Engineer kiba tbit ki ban peit ïa ki kor ki bor kiba yn pyntrei ha kane ka par, kumjuh ruh ki la kular ba ïa ki khyndew bad ki maw ki bym donkam shuh kin buh bha ha ki jaka ki biang bad da kine ki maw ki khyndew yn tep biang ïa kito ki jaka kiba long thliew.
La ong ruh ba ki kot ki sla kiba biang la dep ïoh na u District Forest Officer bad na u Director of Mineral Resource ki ba pynshisa ba kine ki trai par ki la lah ban pyntrei ïa ki par marshun.
Hadien ba la pynsngew ïa kitei ki kaiphot jingkular, u bah Wanshwa Nongtdu, u la ai ka jingkhubei kitbok kitrwiang ïa kitei ki ar ngut ki rangbah jong ka thaiñ ba kin nang kiew shaphrang ha ki kam ki jam ki ban long ka jingmyntoi ïa ki paidbah ka thaiñ, ka ban long ruh kum ka lad ban kyntiew ïa ka ioh ka kot bad kyntiew ruh ïa ka khajna jong ka sorkar jylla.
U waheh Shnong Lumshnong, u bah Monlang Ladong, u la ïathuh ba kitei ki riew rangbah kiba dei ki trai par ki khlem ïaid lait na ka dorbar shnong ha kaba ki la pan ruh na ka Dorbar Shnong ïa ka Mining Lease bad la wanrah ïa kane ha ka dorbar shnong bad ki paidbah nongshnong shnong ruh ki la rai ban kyrshan ïa kane ka public hearing bad khmih lynti ba kane kan ïarap shibun ha ka ioh kam ioh jam jong ki nongshongshnong.
U President jong ka East Jaiñtia Mineral Miners Traders Association, u bah Kermiki Dkhar, u Vice President jong ka East Jaiñtia Mineral and Supplier Exporter and Importer Association, u bah Heral Dkhar, u Secretary Shnong Lumshnong, u bah Embhah Lamare, u Doloi ka elaka Narpuh, u ma Manbha Kyndoh bad kiwei kiwei kiba la ai jingkren ki la ai ka jingkyrshan ïa kane ka public hearing.
Ha kane ka public hearing ym shym la don mano mano ruh ba pyrshah bad lah ban ong ruh ba kane ka public hearing na ka bynta ban pyntrei ïa ki par mawshun jong u bah Lamshwa Kyndoh bad u bah Tenson Dkhar, ki long kiba iaid beit bad ba jop.
