Shillong, Nailur 01 : Ka Shillong Referees Society kaba dei ka kynhun jong ki referee ha ka 1 tarik Nailur 2022 ki la rakhe ïa ka sngi jong ki referee ne ka Referee’s Day da kaba pynlong ki prokram bapher bapher ha Nongbah Shillong.
Ha ka por mynstep la pynlong ïa ka jingïalehkai paralok hapdeng ki referee bad ka Shillong Press Club ha madan Third Ground jong ka MFA ha Polo. La pynlong ruh ka jingpynkhuid ïa ki sawdong sawkun jong ka madan Polo ha kaba ki referee ki la ïashim bynta ban tam ïa ki ñiut ki ñier bad ki plastik.
Ka SRS ka la pynkup burom ruh ïa u Bah R. Rani u referee ba la shongthait noh bad ruh ïa ki katto katne kiba ju ïarap man ka por ïa ka kynhun ha ka liang ka jingïalehkai football.
Ha ka jingïalehkai paralok la wan ban sakhi ruh u Bah Arki Nongrum uba dei u CEO ka Meghalaya Football Association uba la ai ka jingïaroh ïa ki referee kiba dei kiba hakhmat eh ha ka liang ka jingïalehkai football kiba bunsien ki shah kynthoh hynrei khlem ma ki yn ym lah ban pynlong ïa ka jingïalehkai football.
U la ai khublei ruh ïa ka kynhun ki nongthoh khubor kiba ju ïarap bad kyrshan man ka por ban kyntiew ïa ka football bad kiwei kiwei ki jait jingïalehkai. Ha kaba kut jong ka jingïalehkai la sam ruh ïa ka trophy kaban sah jingkynmaw sha ka Shillong Press Club bad sha ka SRS.
