Bun tylli ki mat la ïakren ha ka jingïalang paidbah jong JHTOA ha Tuber Tahkhñiang

Khliehriat, Nailar 31 : Ka Jaiñtia Hills Truck Owners Association (JHTOA) ha ka jingïalang paidbah ba la pynlong mynta ka sngi ha shnong Tuber Tahkhñiang, East Jaiñtia Hills District, ka la ïoh ban ïakren halor shibun tylli ki mat kiba donkam bad ha kane ka jingïalang la pynrung shuh shuh ruh ïa ki dkhot sha kane ka Association bad na ka bynta kito ki bym pat rung dkhot la ai por ïa ki naduh ka 1 tarik u nailur haduh 30 tarik u Nailur, ha kane ka sngi la ïakren ruh halor ki mat ki ban kyntiew shuh shuh ïa ka kam khaiï pateng.
Ha kane ka jingïalang, ki nongïalam jong ka JHTOA kiba la ai jingkren ki la ïakren halor ka mat ba kin ai noh da ki slip sha kito ki trai trok bad kyntu ruh ïa ki ba kin sngewbha ban register kyrteng noh bad ka JHTOA ban ïoh ïa ki slip, la iakren ruh halor ka mat ban kyntiew noh ïa ka jingïaid ki trok kiba ju kit jingkit sha ki karkhana dewbilat kata na ka 60 tylli ki trok yn kyntiew shuh shuh ki ban kit jingkit ha ki karkhana dewbilat kiba don ha East Jaiñtia Hills District bad la rai ruh ban ai kawei ka slip ïa kawei ka trok, kata ha ka shi sngi.
Ka Association ka la shim ruh ïa ka rai ban buh ïa ka ophis jong ka JHTOA ha Phra Mer, West Jaiñtia Hills District ka ban long ruh kum ka headquarter.Ka JHTOA lyngba u President, ka kyrpad ïa ka sorkar jylla ba kan ailad bad shah ïa ka Association ban ai (issue) ïa ki chalan kaba na ka bynta u Dewïong uba dang sah 32 lak MT uba hapoh ka Coal India Limited (CIL).
Ïa ka jingialang la pyniaid da u bah Working Ryngkhlem, kiba ai jingkren ki kynthup u President JHTOA, u bah Biangshwa Shylla, u General Secretary, u bah Harpidiyou Suiam, u bah Balen Thubru, u bah Graham Lyngdoh, u bah Sangot Mulieh bad kiwei kiwei.