Shillong, Nailar 30 : Tang bakla tiak bad lada ym don ka jinglehhok ha ka jingai tiket ha ka Nongkrem Constituency la pait beit phrak ka UDP bad khlem pep kan mih beit ka UDP (O) ne A,B C kumba ju long ha kiwei kiwei ki seng haba don ka jignleh shilliang khmat kumba long ha ka UDP mynta ong ka kyrwoh ba la phah da ki nongkyrshan ka seng UDP ba kynthup ïa u bah T Kharumnuid, Bah Fernando Nongkhlaw, Terence Phira, bah R Tariang, kong A Mawthoh, kong B.S Mawrie bad kiwei kiwei.
Ha ka kyrwoh ba la phah da kine ki nongkyrshan ka UDP ki la pynpaw ha ka kyntien lamphang “Ym don Original – Duplicate UDP?” ki la ong “ Ngi la ïohi ïa ka jingpynshai i Dr. Jemino General Secretary UDP, ha ki kot khubor, ba ka Seng UDP kam don ar-lai tylli, hynrei tang kawei. Kumno i Bah Jemino i kam ba ka seng ka burom ïa ki nongïalam barim, haba ha Nongkrem Constituency jong ngi, la khreh bad la pynsawa ruh ba ïa ka ticket UDP yn ai sha u Bah Lambor Malngiang u bym dei u dkhot ka Seng bad u bym shym pynjan hi ruh sha ka Seng,kum uta u Associate MLA, kumba la leh i Bah S.K.Sun ka Mawphlang Constituency bad Samuel Sangma na Garo Hills kiba dei ki independent MLA?
Balei ka seng ka kyllaiñ haduh mynta bad la pynshai ruh ïa ka kynhun jong ka UDP jong ngi, haba la ïakynduh ïa u President Bah Metbah Lyngdoh ha ka 8.7.2022 ba la don lang ruh i Bah Jemino, ba dei ban ai ticket ia i Bah Bindo Lanong hynrei la pynshai pynban ban ai sha i Bah Lambor, u briew uba la ïaleh teng na ka KHNAM, Congress bad Independent? Hato kata ka dei ka burom ïa ki rangbah barim (Senior)?
Ma ngi ki nongkyrshan i Bah Bindo, na ka bynta ki paidbah ba ïadon kti lang na kane ka Constituency, ngi dawa ba phin leh hok ïa u briew uba la aiti ïalade shi lynter, da kaba bishar hok, ym ban leh arsap da ka mynsiem pihuiñ. Lada phi kwah ban sngap shisha ïa ki paidbah, ngi kloi ban wan ha kano kano ka sngi
bad ka jaka, ym kumba la leh kyrkieh ha ka 8.7.2022 haba ngi la ïawan da ka kynhun ki 12 ngut.
Lymda phim leh hok, kin mih beit ki UDP ‘O’ ne A,B,C, kumba ju long ha kiwei ki seng leh shiliang kum ka UDP mynta, ïa kaba phi hi phin sa long ka daw jong kata.
