Shillong, Nailar 30 : Ka sorkar jylla lyngba u Symbud Myntri Rangbah ka Jylla, Bah Prestone Tynsong ha kane ka sngi Ba-ar u la pynbna ba ka sorkar ka la rai ba kan ym pynkynriah shuh ïa ki briew ba sah ha Them-metor sha Mawbah – Mawprem kaba hap ha Shillong West Constituency.
Da kaba pynpaw ba dang shen ki nongïalam shnong ryngkat u nongmihkhmat ki la wan ban pyrshah pynkynriah ïa kitei ki briew ba sah ha Them-metor sha katei ka thaiñ u Bah Prestone u la ong, “Ngi hap ban pynkynriah beit ïa kitei ki briew na katei ka jaka, tangba kam dei shuh ha kane ka thaiñ jongphi.”
Lah ban kdew hangne ba ki nongïalam shnong jong ka Mawbah ryngkat u MLA ka Shillong West, Bah Mohendro Rapsang dang shen ki la leit ban kynduh ïa u Bah Prestone uba dei ruh u Chairman ka High Level Committee ba kum u nongmihkhmat ryngkat ki nongïalam shnong ki ieng pyrshah jur ïa katei ka jingthmu jong ka sorkar.
