Shillong, Nailar : Ka Mait-Ti Society ka la pynlong ïa ka Awareness Programme halor ka phang “Ka Jingshongkha Khynnah (Child Marriage)” ha ka 26 tarik Nailar, 2022 ha E. Usai Memorial Hall ha kaba ki skul na ka Shnong Laitmynrieng, Shnong Nongmadan, Shnong Pynursla, Shnong Rangthylliang bad na ka Shnong Urksew-Wahpathaw ki la wan ban ïashim bynta.
Ha katei ka sngi la maitphang ïa ka Programme da u Chairman ka Mait-Ti Society Bah Mewanshwa Nongrum bad la ïoh ruh ki jingkren kyntu kynpham na u Bah Edmund Khongngai u ba dei ruh u kyrtong na ka Pynursla Constituency. I Kong M. Khonghat bad I Bah B. Chyne kiba dei ki Resource Person kiba wan napoh ka District Child Protection Unit – East Khasi Hills District, Shillong ki la ai ki jinghikai halor ki Kyndon – Ka jingpyrkhing na ka shongkha khynnah bad halor ka POCSO Act 2012. Na ka liang ka Tnat ka Koit ka Khiah CHC Pynursla, I Dr.Myntu Shylla I la batai shai halor ka jingeh lada shongkha lane ïoh khun khynnah.
Ka Mait-Ti Society ka ai khublei bad pynpaw ka jingsngewnguh ïa u Bah E Kharmalki (IAS) Secretary-Social Welfare Department, SDO Pynursla Civil Sub-Division Kong Evarinia Liza Warjri (MCS), BDO Pynursla Block Shri Gautam Warjri (MCS), BADO Pynurlsa Bah Shongdorlut Mawlong (MCS), ïa ka Tnat ka Koit ka Khiah CHC Pynursla, ka Police Department Pynursla, ïa ki Rangbah Shnong, ïa baroh ki skul kiba la wan ban ïashim bynta ha katei ka prokram bad ïa baroh ki nongleh bha kiba la ai mynsiem ïa ka Mait-Ti Society ban nang ïai trei ïa ki kam babha hapoh ka Thaiñ Riwar Mihngi Pynursla. Kane ka long katkum u kyrwoh lyngba u Bah Ehboklang Nongrum, Publicity Secretary Mait-Ti Society.