Hiar ki nongïalam seng ban ïathir bad ki Rangbah Shnong ka Block II

Nongpoh, Nailar 30: Ki heh nongïalam ka RBYF mynta ka sngi kila hiar sha ka shnong Mawlasnai ha Ri-Bhoi naka bynta ban ïakynduh lut ïaki nongïalam shnong jong ka thaiñ Block II ha shuwa ba ka sorkar kan sdang ïaka jingpynbeit pud ïaka wat kaba ar naka bynta ban pynthikna ïa u pud u sam bad ban lum jingtip naki nongïalam shnong ka thaiñ shaphang ka jinglong jingman ha katei ka thaiñ ba ki paidbah kim dei ban mad jingeh bad khamtam ba ka sorkar kam dei ban bakla ha kane ka jingpynbeit pud kaba mynta.
Naka liang ka seng hapoh ka jingïalam u Bah Bipul Thangkhiew President, ryngkat bad ki dkhot haka jingdonlang ki nongïalam ka Synjuk ki Rangbah Shnong Raid Nongtung naduh u Bah B Sohtun President, Bah Alloysius Bina Secretary bad kiwei kiwei kila ïathir bad tai sani kumba ka seng ka kwah ban lum jingtip ïa u pud u sam bad ki shnong ha katei ka thaiñ.
Haba kren sha ki lad pathai khubor hadien ka jingïalang bad ki nongïalam shnong u Bah Bipul Thangkhiew President ba rangbah ka RBYF u la ong ba kum ka seng ka dap da ka jingsngewkmen ba katei ka jingïalang ha katei ka sngi ka long kaba sei soh ha kaba kum ki nongïalam ka seng kila ioh ban mir jingmut ban ïatai sani bad da kawei ka sur ka seng RBYF kan kyrshan beit ïaka jingdawa jong ki Rangbah Shnong katei ka thaiñ ba ki shnong Khasi kiba don kumba 18 tylli ki shnong kynthup ruh 4 tylli kiwei pat ki shnong Khasi ki ban sa leit ban ai jingthoh biang sha u Myntri Rangbah ki dei ban shah kynthup haka jylla Meghalaya ym sha Assam.
U la ong ruh ba ha katei ka sngi la ioh ban ïathir sani bha halor ka Gazette Notification ka sorkar Assam Dated 19 Ïaiong 1951 bad ruh halor ka jingdawa ka United Khasi Jaiñtia ADC ha kaba ïadei bad ki jaka jong ka jylla Meghalaya ba kum ka seng kam kwah shuh ba ka sorkar kan dang bakla haka jingpynbeit pud kum ha ka wat ba nyngkong ha kaba shibun ki jaka baka jylla Meghalaya kala duh noh bad ka jingmih ki huri hura.
Shuh shuh u Bah Bipul Thangkhiew u la ong ruh ba ki nongïalam shnong kila ïathuh ruh ba haka jingïakynduh bad u Myntri Rangbah dang shen haka 9 tarik Nailar ha Secretariat u Myntri Rangbah u la kular hakhmat ki nongïalam ka Synjuk ki Rangbah Shnong Raid Nongtung ba yn kynthup lut ïa baroh ki shnong Khasi ha kane ka jingpynbeit pud ka wat ba ar, hynrei kaba sngew lyngngoh ka long ba mynshuwa haka jingïakynduh bad u Dr Mukul Sangma la pyni hakhmat ki nongïalam shnong lyngba ki kor komputer ba ki shnong khasi baroh ki hap haka jylla Meghalaya katkum ka kaiphod ha u snem 2011, kaba kum ki nongïalam shnong kila pynpaw ka jingsngewkmen kaba khraw, hynrei hadien ba ki nongïalam shnong kila pan ïaka map ha kine ki sngi bala dep noh kala pynktha khlieh pynban ïaki nongïalam shnong ba ki don satang 4 tylli ki shnong kiba paw ha katei ka map katba kiwei ki shnong ki la jah lut, kaba paw shai ba kila jah naka jylla Meghalaya.
U la ong ruh ba naka liang ka seng kam kwah ban ïakren bad padiah kulmar, hynrei kum ka seng ka kyrshan ïaka jingdawa jong ki nongïalam shnong bad nongïalam Raid kiba tip khambha ïaki jaka puta bad u pud u sam ha katei ka thaiñ, bad lada ka sorkar kam sngap ïaka jingdawa jong ki nongïalam shnong ki riew rangbah, naka liang ka seng kam pdiang da lei lei ruh ïaka jingpynbeit pud bad byrngem ruh da ki jingïakhih ba tyngeh.
U Bah Blik Sohtun haba kren ha katei ka sngi u la pynpaw ka jingsngewkmen halor ka jingshimkhia jong ki nongïalam ka RBYF kiba la hiar sha katei ka shnong ban tip shai ïaka jinglong jingwan bad ban wad jingtip naki nongïalam shnong halor u pud u sam, hynrei kum ki Rangbah shnong bad ki nongïalam Raid kila pynpaw ba kim kwah shuh ban khyllie ïaka bym lah shuh ban long, hynrei naka liang jong ki, ki ba jur beit ba baroh ki shnong Khasi haka thaiñ Block II kim dei ban leit sha Assam bad ki dei ban sah haka jylla Meghalaya.