Da ki jhur rah ki nongrep ba kmen palat ba ïoh shiteng dor ka sboh dawai

Shillong, Nailar 29 : Da ki spah ngut ki nongrep na kylleng ki shnong jong ka Mawkynrew Constituency ki la tuid sha ka jingïalang kaba long ha kane ka sngi Nyngkong ha Laitkyrhong ban ïohsngew markhmat na ki nongïalam ka Farmer Cell haba ïadei bad ka dor sboh dawai ba ka sorkar ka pynbna dang shen.
Kitei ki nongrep ki la rah ruh da ki jhur bad ki mar rep ban ai sngewbha ha u Chief Adviser jong ka Farmer Cell, Bah Kansing Lyngshiang namar ka jinglah jong u ban pynkohnguh ïa ka sorkar jylla ban ai shiteng dor ïa ka sboh dawai kaba baroh shi katta ki thied ha ka dor kaba rem bha.
Haba kren ha kane ka sngi, u Bah Kansing u la ong ba katei ka jingïalang ba ki khot ka long ban pynshai ïa ki paidbah ba kin ym sngewthuh bakla haba ïadei bad ka dor jong katei ka sboh dawai. U ong ruh ba ki nongrep ha katei ka thaiñ ki la kulmar namar shipor don kiba pynbna ba ka sorkar kan ym ai subsidy ne map shiteng dor ïa ka bai sboh dawai bad shiphang pat da kumne kumtai.
“Nga don da ka jingthoh ban pynshisha bad pyntikna. Kumta wat shah ïalam bakla hano hano ruh. Tang shu poi ka sboh dawai ha Mecofed ka dor ba phin siew kadei shiteng dor namar shiteng na ka dor jong ka la pynsiew da ka sorkar,” ong u Bah Kansing.
Shuh shuh u ong ruh ba dei ka jingsngap jong u Myntri Rangbah ka jylla Conrad K Sangma bad kumjuh ïa u Symbud Myntri Rangbah Bah Prestone Tynsong, ïa ka jingud ba ka Farmer Cell ka pynsngew ba naduh kane ka samoi ki nongrep kin sa ïoh noh ïa ka dawai sboh ha ka dor kaba mar shiteng.