Shillong, Nailar 29: U nongïalam ka National People’s Party (NPP) uba dei ruh u myntri ha ka sorkar jylla u Ma Sniawbhalang Dhar ha ka sngi nyngkong u la pynpaw ïa ka jingsngew thikna kaba skhem ba ka NPP kan ïoh ban synshar biang ha u snem 2023.
Haba ken sha ki nongthoh khubor, u Ma Sniawbha u la ong ba kum ka party kim don satia ka jingartatien ba tang shi sapit ruh ba ka party kan ïoh palat ïa ka 30 ngut ki MLA ha ka ilekshon ban wan. “Ngim artatien ban ïoh 34-35 ngut ki MLA bad ba ka NPP kan dei ka party ba jop bun tam ha ka ilekshon” u la ong.
U Ma Sniawbha u la ong ruh ba ki kam kiba ka sorkar MDA hapoh ka jingïalam ka NPP ka la leh na bynta ka bit ka biang jong ka jylla ha kine ki 4 snem shiteng, kin dei ki daw ba ki paidbah kin wanrah biang ïa ka sorkar NPP ha ka bor”.
“Ki paidbah ki la stad bad ki sakhi ba ka sorkar MDA hapoh ka jingïalam ka NPP ka la leh shibun bah ki mat bad ki kam pynroi na ka bynta ka jylla”, u la ong.
Shuh shuh u la ong ruh ba ka NPP kat nang mih ki sngi ka nangkhlaiñ nangkhlaiñ ha kylleng ki bynta ka jylla bad u la kam ruh ba shen 8 ngut ki MLA na kiwei pat ki seng saiñ pyrthei kin wan ban pynïasoh sha ka NPP ban ïakhun na ka Kot ha ka ilekshon 2023. “Phim tip ïoh hadien lai bnai ruh kiban pynïasoh bad ngi kin poi 10 ngut ruh bad ka jingpynïasoh ki riew pawkhmat sha ka NPP man ka sngi ki dei ka sakhi ba ka party ka nangkhlaiñ bad nangïohbor man ka sngi”, u la bynrap.
U Ma Sniawbha u la ong ruh ba ka jingïatylli ha ka party ka dei ka jingkhlaiñ kaba tang ka NPP hi kaba don, “ha ka NPP ym ju don Team A, B ne C hynrei ngi long kawei mlon bad ngi long ruh ka party bym don ka huri hura ne kano kano ka kynrum kynram” u la ong.
U Ma Sniawbha u la ong ba u don ka jingngeit kaba skhem ba u Myntri Rangbah ka jylla u Conrad K sangma un dang bteng ban long u Myntri Rangbah hadien ka ilekshon.
“Ka Meghalaya ka dei kawei, sngewbha wat pyrshang ban pharia da ka jinglong jaidbynriew Khasi ne Garo” u ong haba jubab la u kyrtong Myntri Rangbah un dei na rilum Khasi ne Garo.
Haba ïadei bad ka jingkynnoh bamsap ka TMC pyrshah ka sorkar, u Ma Sniawbha u la ong ba ka dei ka rukom bad ka kamram jong ka liang pyrshah ban kynton shi rynjaiñ ki jingkynnoh ïa ka sorkar”.
“Ka liang pyrshah bad ka liang synshar ka don ka jingïapher kaba khraw bha, lada ngi kum ka sorkar ngi leh ïa kaba bhatam ruh ka dei ka kamram jong ka liang pyrshah ban kynthoh laiphew rukom” u la ong.
Haba ïadei bad ka jingkynnoh ba ka don ka jingtih dewïong be-aiñ u Ma Sniawbha u la ong, “Ngi la pyrshang ïa kaba bha-tam ban khang ïa ka kam tih dewïong be-aiñ bad ka long kaba eh ruh ba ki ophisar kin bud tdong shaei ka don ka jingtih dewïong be-aiñ”
U Ma Sniawbha u la kam ruh ba ka TMC kan ym jop satia palat ïa ka 7 seat namar ha rilum Khasi lei kan ym jop tang uwei ruh “lehse katto katne ngut ki lah ban jop na Garo Hills kata ruh ym palat ïa ka 7 ngut ” u la ong. Shuh shuh u la ong ba ka jingïakhun ha rilum Khasi kan dei beit hapdeng ka NPP pyrshah ka UDP ha jan baroh ki constituency.
