Hapdeng ka jingshongkun sdang ka 3rd Mawkynrew Cup 2022-23, pynliem ka Mawjatap ïa ka Lynshing

Shillong, Nailar 28 : Ka 3rd Mawkynrew Cup ka lympung ïalehkai football ba hehduh jong ka thaiñ Mawkynrew ka la sdang ha ka sngi Saitjaiñ ka 27 tarik Nailar 2022 ha madan jong ka Shnong Mawleiñ. Ïa katei ka lympung ïalehkai football knock out la plie pyrda da u Bah Banteidor Lyngdoh uba dei u Myntri jong ka tnad ki kam ïalehkai ka Jylla ha kajuh ka por uba dei u MLA jong katei hi ka thaiñ kum u Kongsan ha ka jingïadonlang ka Dr Amanda Pakynteiñ kum ka Symbud Kongsan.
Ha katei ka sngi sdang ka Mawjatap FC bad ka Lynshing SC kidei ki ar tylli ki team kiba la mih madan nyngkong ha kaba ka Nawjatap FC ka la jop da kaba pynliem lyngba ka tie breaker da 5-2 kol.
Shwa ban sdang ka jingïalehkai la pynlong ki prokram kiba pher bapher ba kynthup ka jingïaid March pass, ki jingrwai bad jingshad, ka jingkhap ïa u ribbon kum ka dak ka jingplie ïa ka madan bad gallery, jingpynher ïa ka lama jong ka Mawkynrew Cup Committee kum ka dak ba la plie ïa katei ka lympung 3rd Mawkynrew Cup.
La ïoh ban pule ïa ka history jong ka jingïaid lynti ka Mawkynrew Cup ba la pule da u Bah T. Pohshna bad ka jingpynkup burom ïa ka Dr. Amanda Pakynteiñ kaba la pyndep ïa ka Doctorate in Education for the Under Priveledge Children kaba dei ruh ka Chairperson jong ka Mawkynrew Cup Committee.
Haba kren ha kane ka jingïalang ka Kong Amanda ka la pynpaw ka jingsngewkmen ba ïa kane ka lympung la ïoh ban pynlong biang hadien ar snem ba la sangeh noh na ka daw ka jingpynthut ka khlam COVID-19. Ka la ïathuh ruh ba watla ka la don ka jingpynthut shwa ban sdang ka jingïalehkai hynrei da ka jingtrei shitom ki nongpynïaid katei ka lympung ka la long kaba ïaid beit ïaid ryntih.
U Bah Banteidor Lyngdoh haba kren kum u Kongsan u la ïathuh ba lyngba ka jingpynlong ïa ka Mawkynrew Cup ki la mih shibun ki samla jong ka thaiñ kiba la ïalehkai ha ka lympung kaba heh hapoh ka jylla kum ha ka Super Division. U la ong ba kum u nongmihkhmat u kwah ban kyntiew ïa ki kam ïalehkai hapoh ka thaiñ da kaba pynbiang ki madan ïalehkai bad ki stadium. U la ïathuh ba ki don ki shnong kiba la ïoh ki stadium bad ka Mawleiñ kadei kawei kaba la ïoh ïa ka stadium bad don ruh kiba kiba dang don hapdeng ki jingpynkhreh ban ïoh ki madan ïalehkai.
U la pynbna ruh ha katei ka sngi ba ha u Nailur yn pynlong sa ïa ka Mawkynrew Athletics Meet ha kaba baroh ki skul jong ka thaiñ Mawkynrew kin ïoh ban ïashim bynta ban pynpaw ïa ki sap ïalehkai. Ïa kane u la ïathuh ba yn pynlong ha ryngkat ka jingïatreilang bad ka Directorate of Sports and Youth Affairs bad mynta ka dang don hapdeng ka jingpynkhreh.
U la kyntu ïa ki nongïalam jong ka Mawkynrew Cup Committee ba kin dang ïai bteng ban pynlong ïa katei ka lympung (Mawkynrew Cup) ha ki snem kiban dang wan bad na ka liang jong u, un ïai don ryngkat ban kyntiew ïa ki kam ïalehkai hapoh ka dong bad ka thaiñ Mawkynrew bad ha ka Jylla hi baroh kawei.
Haba phai sha ka jingïalehkai hapdeng kitei ki ar tylli ki team, ka jingïalehkai ka long kaba itynnad bad ïakhaid bha hapdeng ka jingwan sakhi da ki spah ngut ki paidbah. Ka jingïalehkai naduh ka kylla step haduh ka kylla miet ka la kut da ki jingïapyrshang thep kol. Bad haduh kaba kut ym shym la don ba lah ban pynkhih jar kumta la rah noh sha ka jingïashut tie breaker bad dei ka Mawjatap kaba la jop ha kaba ka la lah ban pynrung baroh san kol katba ka Lynshing tang 2 kol.
Ha kane ka sngi la donlang naduh ki nongkitkam jong ka Mawkynrew Cup Committee, sordar jong ka Shnong Mawleiñ Bah P. Mukhim, ki riew Rangbah, longkmie longkpa, ki samla shynrang bad kynthei haduh ki hep kiba rit.
Ha ka jingïaid March Pass ka Laitkyrhong ka la long ka nongjop ha ka liang ki shynrang katba ka Mawlali ka la jop ha ka liang ki kynthei bad ki ïoh khur mar 10 hajar tyngka.