La 70 snem, 45 ngut ki CEM bad spah ngut ki EM, kumno kim tip ïa la u jong u pud u sam: HITO

Shillong, Nailar, 27: Ka la dei ka por ban ïa shai ki MDC bad kine ar KHADC bad JHADC ki don katkum ka Sixth Schedule mynshwa “United” mynta “Divided” hapoh ka Constitution Ri India ban leh aiu? ong u President ka Hynñiewtrep Integrated Territorial Organisation (HITO) u Bah Donbok Dkhar.
“Ha ka por elekshon la juh pyrta ba ka Sixth Schedule ka dei ka stieh ka jaidbynriew hynrei mynta ka kylla long ka “ktieh” kat nang ïa ksaid nang ngam,” ong une u nongïalam ka HITO ha u kyrwoh ba la phah sha ki lad pathai khubor.
“Haba ngi la jied ïa ki MP -1, MLA 36 ngut bad khamtam ki MDC 60 ngut kaei pat kaba pynlong ïa ki ban ïa shong sngap jar. kane ka jingïashong liang ha ki District Councils ka wanrah ïa ka jingtlot kaba jur namar kumno ngin ïa leh pyrshah bad ka Secretariat ha kaba ïadei ha kajuh ka seng?” la kynthoh u Bah Dkhar.
“Balei ma ngi ki paidbah ngin hap ïa leit kiew iinglieh iingsaw, ngim hap ïa mih sha madan, haba ngi ladep jied ïa ki MDC haduh 30 ngut bad ïa ki MLA haduh 36 ngut kiba ïoh da ka jingsiew kaba heh manla u bnai, ïoh ophis, ïoh kali, ki muktiar ba bun. Shano ki 36 ngut ki MLA bad shano jah ki MP baroh kine ba la jied da u paidbah? Ki MLA MP MDC ki bym ïahap ïa ka MoU ki ladei ban ieh noh kam na ka shuki,” u la ong.
U la ong ruh ba kat kane ka kynrum kynram ha u pud u sam kine pat ki MDC MLA, MP ba donburom ki ïa sngap jar jar kim ïa mih sha madan kim ïa leit ïakynduh ïa u paidbah lane ban ïalam ïa u paidbah sha Secretariat. “Wat ka shithi KHADC bad JHADC kynthup ki kot ki sla kiba ki ai sha Secretariat ruh kim pynlait paidbah. Kata ka kaiphod Regional Committee ruh ka jah shaei?” la buh jingkylli u Bah Dkhar.
“Pynban kaba sngewsih ki ong ba ka KHADC ki ong kim don bynta bad ki Hima kin hap leit hi sha Supreme Court . Kane te long kumba tied da u nembah ïa ki Hima/Elaka lada kim don bynta ki Hima/Elaka ki ladei ban mih noh pynphai thang paidbah noh ïa ki Sanad bad kan myntoi aiu ban ïadon bynta bad kane ka District Coucil bad Sixth Schedule ka bym lah ban ïada ïa u pud u sam. Kaba kham lyngoh ka long ba hadien 70 snem ka jingdon ka ADC ki dang ong ba ngi dang lum ïa ki kot lum sla na ki Hima/Elaka, ka jingkylli ka mih biang 70 snem la don kumba 45 ngut ki Chief Executive Member (CEM), ki Executive Member(EM) da ki spah ngut ki MDC ki MLA ki MP ki ïa leh aiu kiba la ïoh mluh tulop na ka pisa u paidbah? Kumno kat ka District Council kam don ïa la u jong u pud u sam uba ithuh da ka Sorkar India hapoh Riti synshar ka Ri India,”u la ong.
“Sa kawei kaba long kaba lehraiñ katkum ka jingmih kotkhubor ki jingkren jong u Myntri Rangbah ka Jylla Assam bad Meghalaya ka long ba ki ADC Assam ki kham donbor ban ïa ki ADC hapoh Meghalaya bad la hap ban pynrung ai shuki ïa ka ADC Assam hapoh ki jingïakren ïa u pud u sam. Ka la bha ïa ki MDC baroh jong ki ADC hapoh Meghalaya ban shim ka rai ban resaiñ ban pyndam noh ïa ki ADC hapoh Meghalaya namarba ka la pawshai ba kim donbor bad kim dei kiba lah ban ïada ïa ka Ri Khasi bad Jaiñtia ki la long tang ka jinglut ei ka pisa u paidbah kat haduh shu kha-ei ka Political Party na ka KHADC,” u la ong shuh shuh.
“Sa kawei kaba la ktah jur ïa u pud u sam sha khappud Assam bad Bangladesh ka dei ka jingbym lah jong ki ADC bad baroh spah ngut ki MDC, MLA, 70 ki snem mynta MDC kiba da ïoh da ka tulop ban pyndep ïa ka “Codification” ka jingpynlong jingpynjanai ïa ki “Aiñ” ïa ki Riti Dustur kaba mut ki Riti Pynïaid kam- “Constitution” jong ki Hima /Elaka lane ki Khasi Nation,” u la ong.
“Lada jin ba ki la pynskhem pynmih mynjur ha ryngkat ka kyrteng jong baroh ki Shnong bad u pud u sam da u Lat ha ka Official Gazette katkum ka Clause 11 jong ka Sixth Schedule katno kan long shisha kaba shngaiñ ïa ka Ri Khasi bad Jaiñtia. Hynrei hangne ruh la pulom kane ka Sixth Schedule namar kiba shah jied kim shym don por mynta 70 snem ban pyndep ban thaw ïa ki Aiñ ki Riti treikam jong kine ki Hima /Elaka lane kiba ngi ong ki “Nation” 54 tylli hapoh Khasi bad 19 sha Jaiñtia bad 1400 tam ki A’king Nokma sha Ri Lum Garo. Pynban ngi ïohi ba kane ka ADC ka la shu long tang ka jaka ban pynlut por ban pynkhreh ïa ka MLA Election,” la kynthoh u Bah Dkhar.
“Namarkata ka jaidbynriew ngi hap ïashai noh halor kane ka jingmyntoi aiu ban don ka Sixth Schedule kaba khlem bniat bad kaba ktieh ka jaka ieng ha kaba kat nang khih nang ngam,” ula ong.
“La bha shisha ïa kine ki MDC baroh ban ieh noh (resign) noh namar ka jinglehraiñ ba ha u pud u sam la u ADC Assam u ïoh ïa ka shuki shong ka burom ka jingithuh katba u ADC Meghalaya pat uba synshar da ka juh ka rong um don bniat bad um skhem jaka ieng bad um don shuki ban shong ha ka miej ban ïa kren pynbeit pud u sam hapdeng ka Meghalaya bad Assam,” la pynkut u kyrwoh.