Shillong, Nailar 27: U Working President ka United Democratic Party (UDP) u Bah Paul Lyngdoh uba long ruh u MDC jong ka Jaïaw Constituency ha ka sngi Satjaiñ u la ong ba u Dr. Aman War u kyrtong jong ka UDP na North Shillong un ïoh ïa ka jingjop ha ka ilekshon ban wan kumba u la jop thma pyrshah ïa ka khlam COVID-19.
Haba kren ha ka jingïalang pynskhem ïa ki nongkitkam jong ka UDP-Youth Wing ka North Shillong Circleu Bah Paul u la ong ba um don ka jingartatien eiei ba u Dr Aman War un poi sha ka thong namar wat ïa ka thma pyrshah ïa ka khlam Covid kaba la lynshop jin arsnem ïa ka jylla u la lah ban ïakhun bad ban jop ruh ym kum u kyrtong ka NPP uba la lam khmat ban tei ïa ka ïing dorbar ka jylla ha kaba ka khyllem pynban.
“Kumba ïaid ka khana ba ka jingïakhun ha north Shillong ka dei hapdeng u Covid bad u Dome nga kwah ban ong ba u niongïalam ban ïakhun pyrshah ïa u Covid u la lah ban jop katba u nongïalam ban tei ïa u Dome pat u khyllem jraiñ bad kane ruh kan jia ha ka ilekshon 2023” u la ong.
U la banjur ïa ki nongtrei ka party khamtam eh ïa ki samla kiba dei ki mynta bad ka lawei jong ka jylla ba kin trei dohïap ban pynjop ïa u Dr Aman War namar u dei u kyrtong uba la biang ka kyrdan bad uba ka rta ruh ka la ih bha rta ban shakri ïa ka jylla bad khamtam eh ïa ka constituency da ka jingstad ym da ka jingsngew ne ka emotion.
U la ong ruh ba ka por ka la dei ba ka jylla kan ai lad noh ïa ka UDP ba kan ïalam ïa ka sorkar namar ki party kiba synshar ha ki 50 snem kim lah satia ban kynjoh sha ka thong bad ka jingangnud kaba ka jylla ka don. Uhaba kren halor ka jingbym ïoh myntri rangbah da ki Khasi da kiba bun bun snem u Bah Paul u la ong “pyrkhat wat ubym long satia kum u MLA u ïoh syndon ban long u Myntri Rangbah ngim donkam ban ïa kren halor ka jingkham khlaiñ bor ki 24 ban ïa ki 36 ngut ki MLA ne ki 2 ngut ban ïa ki 10 ngut ha ka kynhun myntri” u la ong.
U MLA jong ka Mawlai Constituency u Bah Process T Sawkmie haba kren ha kane ka jingïalang u la trer tyngeh ruh ïa ka jingbym ler jong ka Sorkar MDA ha kine ki snem kiba ka synshar ha kaba bun bun ki paidbah ki hap ban mih surok ban dawa ïa ka hok jong ki.
“Dei ka jingbym ler ka ne ka sorkar ba mynta ba wat ki nonghuiikai kin hap mih sha surok ban dawa ïa ka hok jong ki da kaba sah miet da ki taiew, bad ngi kum ka party lada ngi ïoh ban ïalam ïa ka sorkar ngin leh ïa kaba bha tam ïa ka jylla namar naduh mynta ngi la don lupa ka saiñdur” u la ong.
U kyrtong ka UDP na North Shilong u Dr Aman War ha ka jingkren jong u, u la ong ba ka por ban synshar ban bat da ka party kaba mih na ka khynndew jong ka jylla bad kaban trei ruh na ka bynta ka jylla ym kum kiwei ki party kiba mih na kiwei ki jylla ne kiba pyrkhat beit na bynta ka ban pynïar sha kiwei ki jylla. U la ong ruh ba kum kja jylla ka donkam ban ïoh ïa ki briew kiba kynsai ban synshar kiba don ka jingsngewthuh bad ka jingshemphang ïa kaei kaba ka jylla ka donkam ym kiban shu bud tynneng na kiwei ki jylla.
“Kum ka jylla ka donkam ban ïoh ki nongsynshar kiba shemphang ym kiba shu bud tynneng ïa kita ki model kiwei ki jylla kita Kerela, ki Gujarat model kin ym treikam hynrei donkam ban pynmih da ka Meghalaya Model bad kum ka seng hi ngi angnud ïa kane,” ong u Dr Aman War.
Ha kane ka sngi la ïadon lang ruh da ki nongïalam ka party, ki MLA kiba kynthup ïa u Bah Balajied Synrem, u Bah Pius Marweiñ bad kiwei kiwei.
