Shillong, Nailar 27 : Ka Indian Chamber of Commerce ha ka sngi Thohdieng ka la pynlong ïa ka jingïalang kaba la tip kum ka North East Water Conclave ha State Convention Centre, Shillong ha kaba u Myntri ka tnad PHE u Bah Renikton Lyngdoh Tongkhar, u la wan plie pyrda kum u Kongsan. Haba kren ha kane ka sngi U Bah Renik u la ban jur ba dei ban tyngkai bad pynneh pynsah ïa ki tyllong um bad ruh ban ym pyndonkam antad ïa ka namar ka dei ka thymmai jingim. “ Ka um ka dei ka jingim dbad khlem ka um ym don ba lah ban im” u la ong. Na ka liang u myntri u la kyntu ruh ba baroh ki dei ban pynmlien ban tyngkai ïa ka um katba lah bad ban sngewthuh ïa ka jingkordor jong ka. U Myntri u la banjur ruh ïa ka jingdonkam ban tyngkai ïa ki khlaw bad ka mariang khamtam eh ha ki jaka ba jan sha ka tyllong um da kaba ong ruh ba ka por ka la dei ba ka sorkar kan thied noh ïa kane ka jaka khnang ban lah ban teh lakam na kano kano ka jingshah pynjulor ha ki briew kaba lah ban wanrah pat ka jingma ïa ki tyllong um. U Myntri u a kdew ruh ba ha ka jingshisha ka jylla ka ïoh slap pahuh bha hynrei kaba sngew kyndit ka long ba ka um kam lah satia ban rung shapoh khyndew hynrei ka shu tuid beit sha ri thor. “Donkam ban don ka jingtih bniah ïa kane bad ban wad ki lad ki lynti kumno ban pyllang ïa kane ka um” u la ong. Shuh shuh u la pynpaw ka jingsngew bynñiaw halor ka jingtyrkhong ki tyllong um kiba ju tan um ban pynpoi sha u paidbah bad u la ong ba kane ka jingtyrkhong kynsan kynsan ki tyllong um ka pynlong wat ban pyntrei ïa ki skhim pynpoi um ban dkhoh namar ka jingtyrkhong ki tyllong um ba la mang ban tan um sha u paidbah. U la ong ruh ba ka jingrngad wat ki pung,ki dam bad ki wah ka donkam ba ha kane ka jingïalang ban ngam jylliew ïa kane ka phang ban lap ïa ka daw ban ki lad ki lynti ban lait na kane ha shuwa ban dier ka por. Kiwei kiwei kiba la kren ha kane ka jingïalang ki kynthup ïa u Dr S C Sadhu, Secretary Water Resource Department, Meghalaya, u Aankur Patni, Executive Director, Ion Exchange India Ltd, u Sourav Daspatnaik, Managing Director, Swachh Environment Private Limited bad kiwei kiwei. Hadien ba la kut kane ka jingïalang plie la pynlong sa Pleanary Sessions ban puson jylliew bad ban ïatai halor ka phang: Upgradation of water & waste water infrastructure and Leakages in water conveyance lines and storage.
