Shillong, Nailar, 25: Ka All NEHU Worker’s Union (ANWU) kaba la shong ïathir ïatai sani bha ka la rai da kawei ka sur ban pynsangeh noh shipor ïa ki jingïakhih hadien ba kane ka kynhun ka sngewdei ban shim ïa ka jingkitkhlieh na ka bynta ka jingbha lang jong ka University baroh kawei naba ka la ktah shaba palat ïa ka treikam treijam bad ïa ka kyrdan jong ka University na ka daw ka jingpynlong ïa ka jingïakhih kaba khlem pud sngi la jan ar bnai tam.
U Kyrwoh ba la phah da u President u Bah Tenny Shabong u la ong, ïa kane ka rai la shim hadien ka jingkular ba la ai da u Vice Chancellor jong ka skulbah NEHU, Shillong ha kaba ïadei bad ka jingsiew tulop ha kaba un sa wad ïa ki lad ki lynti katkum ka jingïakren bad ka Union ha ka 17tarik mynta u bnai.
Ka Union ka la pynpaw ba ka don ka jingshahniah ha ka jingkular jong u Vice Chancellor hakhmat ka jingïakynduh bad ki nongïalam ka Union ban ïakren sani halor ki jingdawa ban pyntreikam noh ïa ka jingithuh kum ki nongtrei bapura ïa ki nongtrei Casuual, ban siew ïa ka tulop kaba ïaryngkat bad ka kam, ka jingsiew ïa ka por ba la trei kam bad kiwei kiwei.
