Khliehriat Lber 28: Ki dkhot jong ka Dorbar Shnong Thangskai hapoh ka jingialam u Waheh Shnong u ma Phaibiang Syrti mynta ka sngi ki la leit ban iakynduh ïa ki heh jong ka karkhana dewbilat Dalmia Kaba don ha Thangskai bad ki la leit hiar ruh sha ki jaka bret ñiut jong ka company ban dawa bad maham tyngeh ba dei ban pynsangeh noh ïa ka jingwanrah ñiut kaba shu lum thup kaba pyn jakhlia haduh katta katta ïaka shnong ka thaw.
Kane ka jingleit hiar ki dkhot shnong ka dei namar ka jingbym suidñiew ka company ïa ka jing dawa ka shnong kaba la dawa mynta la bun bnai.
Katkum ka jingiathuh u Waheh Shnong la ong ba ka Dorbar Shnong ka la dep phah shithih sha ka company Dalmia naduh u bnai nohprah 2021 bad bthah ïa ka company ba ym dei shuh ban wanrah ïa ki ñiut ha company kaba don hapoh shnong namar kane ka pynmih ïaka jingsma iewtung bad kumjuh ruh ki ñiut ki ju saphriang kylleng kylleng haba beh ka lyer bad ong ba ïa kine ki ñiut la wanrah na Silchar, na Guahati, na Mizoram, Agartala bad na kiwei kiwei ki jaka.
Halor kane ka jingleh ka company ka shnong kala ujor ruh sha u Deputy Commissioner ka East Jaiñtia Hills District myn ha u bnai rymphang 2022, hynrei na ka liang ka ophis u DC ruh kam shym la shim khia eiei halor kane, kumta na ka liang ka shnong kam banse ban hiar sha katei ka company ban maham ïa ka company ban sangeh noh shi syndon ïa kane ka jingwanrah ñiut ha ka jaka bret ñiut jong ka company.
Ka Dorbar Shnong ka la maham tyngeh ïa ka company Dalmia bad kumhuh ruh ïa ki transporter kumjuh ruh ïa ki nong ñiah kali kiba kit ïa kine ki ñiut ba kim dei shuh ban dang wanrah bad pynpoi ïa ki ñiut hapoh Dalmia ha Thangskai, la maham ba lada ka shnong ka dang lap ïa ki kali kit ñiut kiba dang wanrah ñiut hapoh Dalmia ka shnong kan leh da kaba tyngeh.
