Tyrwa ka Maitshaphrang ban pyntreikam noh ïa ka ‘Compulsory Registration of Marriage’ ha ka jaidbynriew

Shillong, Nailar :Ka Maitshaphrang lyngba u Bah Michael N.Syiem kala buh ka jingtyrwa na ka bynta ban pyntreikam noh kloi ïa ka ‘Compulsory Registration of Marriage’ ha ka jaidbynriew ka jong ngi mynta bad kumjuh ïa ka ‘Equitable Distribution of Ancestral and Self Acquired Property,’ khnang ban pynkup ïa ka bor bad ka jingkitkhlieh ïa baroh ki khun shynrang bad kynthei jong ka ïing khnang ba kin lah ban peit ban sumar ïala ki jong ki khun ki kti lashai la shisngi bad kumjuh ïa la ki kmie ki kpa khamtam ha ka jinglong tymmen jong ki bad kane kan long ruh kum ka jngsdang ban pynkhlaiñ ïa ka mynsiem ïakhun jong ka jaidbynriew Hynñiewtrep na ka bynta ki jingïakhun kiba ngin nang ïakynduh nangne shakhmat.
Na ka liang une u nongïalam ka Maitshaphrang u pynkynmaw ruh ba ha ka por ba ki dang leit pule, ki nonghikai ki ju ïathuh ha ki ba ka ha jaidbynriew Hynñiewtrep ym ju don khunswet ne jaka ri khunswet namar ba don ka Kur.Tang shu ïap ki kmie ki kpa, ka kur jong ka kmie ka ri ka sumar ïa ki khun jong ka.Nalor kata ha kane ka dustur ai jait kmie jong ngi tang shu ïap ka kmie, watla u kpa u dang im, ka dustur kam shah ïa u kpa ban ri ïa la ki jong ki khun watla ki khun ki thrang hir hir ban don lang bad u kpa haba la khlad noh ka kmie, namar ki ong ba u kpa u dei na kawei ka Kur.
Haba ka Kur pat kam lah kot bor ban ri ïa ki, kylla khunswet ei ki khun bapli kumba ju iohi lyngba ki lad pathai khubor naka por sha ka por.Dei halor kane ka phang ba ka Maitshaphrang ka pynïalehkai ïa ka drama, “Papa Shano Phi Don” kaba don mynta ha Youtube.
Ka Maitshaphrang kala ong ruh ba ha kine ki sngi ki snem, ngi la ïohi ba la nang bun ki jaka ri khunswet bad shano ki don ki Kur jong kine ki khunswet (Orphanage).
Ki nonghikai ha kito ki por ki ju ïathuh ruh ba namar ba don ka Kur ym ju don ki jaka ri ïa ki Kpa tymmen, Kmie tymmen (Old Age Homes) ha ka jaidbynriew jong ngi.Dang shen ha ka 19.08.2022 la plie ïa ka Kripa Victoria Senior Citizen Home ha Nongsder, Ri Bhoi District ban ri ïa ki Kpa tymmen ki Kmie tymmen kiba la shah ieh beiñ ha la ki khun ha la ki kur, nalor ba la don lypa ka jaka ri ïa ki Kpa bad ki Kmie tymmen (Old Age Home /Mercy Home) ha Nongthymmai, Shillong, la bun snem mynta bad ba la pynïaid da ki Sister jong ka Balang Katholik.Ka jingkylli kaba mih biang, shano ki Kur jong kine ki Kpa ki kmie tymmen.
Ki don kiba lah ban ai nia ba ki don tang katto katne tylli, hynrei ngi ïakren shaphang ka dustur ka bym dei ban don ki orphanage ne ki old age homes haba don ka Kur. Mynshuwa ki don tang iwei ne ar tylli kine ki jaka ri, hynrei mynta ki don da ki phew tylli.Kine ki dei ki dak ki shin ba don ka jingdkoh ha katto katne ki bynta jong ka dustur jong ngi mynta kiba ngim lah ban leh kumba ngim ïohi.
Kumta ruh na ka liang ka Maitshaphrang kala ong ba ka por kala nang ïaid bad ki don bun ki jingkylla ha ka pyrthei mynta.Kumta kala dei ka por ba kum ka jaidbynriew Hynñiewtrep ban ïa puson lang, ban ïa thew ïa woh, ban ïa kylli, kano ka bynta jong ka dustur kaba dang dei ban ïa bat bad kano kaba dei ban pynwandur thymmai khnang ba kan wanrah ïa ka dustrur kaba khlaiñ bad ka ban tei ïa ka jaidbynriew Hynniewtrep jong ngi ban ïakhun pyrshah ïa kiba bun jait ki dustur bad ki jingngeit (agressive cultures and fundamentalist teachings) kiba nabar kiba pyrshang ban thombor ïa ka jaidbynriew jong ngi mynta.