Nongpoh, Nailar 22 : U Samla Biangbor L Paliar, Vice President ka KSU Sengkmie ha ka jingdon ryngkat lang u samla Erick Benjamin Mawlong, Assistant Sports Secretary kum symbud kongsan ha ka 19 tarik u Nailar 2022 u la wan ban pynhap pyrda noh ia ka ‘Wickliffe Syiem Knockout Football tournament’ ba la pyniaid da ka KSU, Mawroh Unit ba hap ha ka snat treikam ka KSU Nongpoh Circle ha Ri Bhoi District.
Ïa kane ka Wickliffe Syiem Knockout Football Tournament ka KSU la pynialehkai ha ka Madan Mawspeng, Mawroh ha kaba ki ar tylli ki kynhun kata ka Nongkhrah FC ka la iakhun pyrshah ia ka Umran SC ban ia knieh ia ka nam lahduh jong kane ka tournament.
Hapdeng ka jingiakhun ban ia knieh ia ka nam lahduh, ka Nongkhrah FC ka la ioh khur ia ka nam lah duh jong kane ka tournament da kaba ka la lah ba pynrem noh ia ka Umran SC da 4-2 kol lyngba ka tie breaker.
Ha katei ka sngi na ka liang u samla Erick Benjamin Mawlong ha ba ai jingkren, u la ai ka jingiaroh ia ka KSU Mawroh Unit ba ka la shim kum ki ne ki siemjam ban kynmaw burom ki riewshlur ka Jaidbynriew lyngba ki progkram ba pher ba pher bad u la kyntu ruh ia ki rang donsap ba kim dei ban pyn sepei ia ka sap ka ba u Blei u la ai ia ki lyngba ka kam ialehkai phutbol.
Na ka liang u Samla Biangbor L Paliar, Vice President KSU Sengkmie kum u Kongsan, u la ong ba ka kam ia lehkai ka dei ka wei ka dawai bah ka ba khlain haduh katta katta, namar bunsien ki kam ialehkai ki pynlait ia ki jingpang jingshitom bad ruh na ki jingmlien ba sniew ha kum ki ne ki sngi ba mynta ka jingjyllei ki jingdih ki ba sniew kum u Drok, ka kyiad bad kiweri kiwei.
U la ban khia ruh da kaba ong ba lada ki samla ki pynlut ia ka por ka jong ki ha ki kam ialehkai kin lait ruh na ki ne ki jait jingsniew bad ua la ai ka jingiaroh ia ka KSU Mawroh Unit ba ka la pynlong ia kum ki ne ki jait progkram namar ka dei ruh ka jingiatylli ne ka jingiajan ha poh ka dong ka thain Ri Bhoi hi baroh kawei.
Haka tei ka sngi la iadonang ruh naduh u Samla Joseph Lambok Rymbai Vice President NKHD, Samla John Lyngdoh President Nongpoh Circle, ki nongialam shnong ka Mawroh Unit bad ki dkhot jong ka Nongpoh Circle bad ka Umsning Circle bad ki members jong ka Mawroh unit.
