Sawsymper, Nailar, 21: Kum ka dak ban ai mynsiem bad pynshlur ïa ka Governing Board jong ka JJM Nichols Roy College, Pongkung na ka liang ka Federation of Khasi Jaiñtia & Garo People’s jong ka Sawsymper Circle ka la ïoh ban ai jingïarap ïa kane ka skul pule ban pynshlur ïa ka Governing Board bad ïa ki samla kiba wan ban pule ha kane ka kolej.
Ka jingthmu ban noh synñiang ïa kane ka kolej ka long ban ai mynsiem bad ban ïai don ryngkat lang bad ban ïa treilang ha man la ki por bad ban ai mynsiem ïa ki nongpynïaid ba kin nang ïai tur shaphrang watla hapdeng bun ki jingeh ba ki ïa kynduh ha kaba ïa dei bad ka kam ban ai ka jingnang jingstad na ka bynta ki samla jong ka dong ka thaiñ Sawsymper baroh kawei.
Lah ban kdew ruh ba kane ka kolej ka dei kaba nyngkong eh ha kane ka dong ka thaiñ Sawsymper bad da ka jingdon jong kane ka la ïarap shibun ïa ki samla kiba wan ha ka longïing baduk khamtam jong ka dong ka thaiñ Sawsymper bad ki shnong ba marjan ki bym shem lah shuh ban phah ïa ki khun jongki ban pule sha Nongbah Shillong bad ha kiwei de ki jaka hynrei ka jingdon jong kane ka kolej ka la ïarap ruh shibun ïa ki kmie ki kpa ki wan na ka longïing baduk.
Ïa ka jingïalang ha kane ka sngi la pynïaid da u bah Hamless Kharbani, Vice President jong ka FKJGP Sawsymper Circle, ha kaba ki nongkren ki long u bah Kitboklang Lyngdoh Marshilong, Education Secretary FKJGP Sawsymper Circle, u Leviss Kharnaior, General Secretary FKJGP Sawsymper Circle, u Runningstar Kharbani, President FKJGP Sawsymper Circle bud da ka jingaiti ïa ka mementos bad ka jingnoh synñiang na ka liang jong ka FKJGP Sawsymper Circle.
Shuh shuh bud biang sa ka jingkren na u bah S.S. Shullai, Principal jong ka JIM Nichols Roy College, u bah James Kharbani, Chief Adviser FKJGP Sawsymper Circle bad ka jingkren khublei na u samla Phrangsngi Nongsiej, Assistant Secretary FKJGP Sawsymper Circle.
