Shillong, Nailar, 20: U Myntri khynnah ka sorkar pdeng uba peit ïa ka tnad kam pohïing u Ajay Kumar Mishra mynta ka sngi Thohdieng ula pynthikna ba ka jingkren ïasuk hapdeng ka sorkar pdeng, sorkar jylla bad ka seng HNLC ka la ïaid shakhmat.
“ Ka jingïakren ka la ïaid shakhmt bad ka seng HNLC bad hadien ba la dep ka jingïakren yn sa pyntip kiei ki rai ba la dep ïashim” ong u Mishra ha ki nongthoh khubor.
U la pynkynmaw ba ka la don ka por ba ki bor bar ri kila pynshlur ban mih kine ki seng kieng atiar bad ki don bun ki samla kiba la shah ïalam bakla bad ki bym kwah ba ka ri kan kiew ha ka roi ka par.
Hynrei u la ong ha kine ki phra snem mynta hapoh ka jingïalam u Narendra Modi kum u Myntri Rangbah ka jylla bad u Amit Shah kum u Myntri kam pohïing ka ri, ki la pyrshang ban thaw ki lad ki lynti kumno ban pynkut bad pynduh pyndam noh ïa kine ki seng kieng atiar da ka lynti jongka jingïakren ïasuk bad ïasngewthuh jingmut.
“ Na kata ka daw ha kiba bun ki jaka ngi la lah ban wanrah ïaki seng kieng atiar sha ka miej jingïakren. Ki don ki jaka ha ka ri kiba ka jinglong jingman kam long shuh ban ïakren ka la sniewdur palat na ka jingdon ki seng kieng atiar hynrei mynta ha kiba kum kine ki jaka ka jingshongsuk kala sdang ban wanphai biang” ong u Mishra.
Haba kylli halor ka jingshah ther ki bor pahara ha Tripura, u Mishra ula ong ba kito ki seng kim kwah satia ban don ka jingshong suk ha ka ri.Namar ka jingroi jingpar bad ka jingshaniah ki paidbah ha ka jingïalam u Narendra Modi, kito ki seng kim lah shah ki la nang bishni bad khim khait ka jingmut jingpyrkhat bad na kata ka daw ki leh ïaki kam pyntriem ban pynthut ïaka shongsuk shongsaiñ. Hynrei ka sorkar kala rai kut ba kan trei borbah ban ïeng pyrshah ïa kiba kum kito ki seng bad kan leh ruh da kaba tyngeh ban pyntroiñ ïa ki.
