La jingwad bniah ki stad nongtohkit mynta ki la lap ba ka jingdih kyiad ka don bynta ha kaba wanrah ïa ka jingma na ka jingshitom kaba ktah ïa u dohnud bad ba ka jingdih kyiad ba man la ka sngi ka nang kyntiew shuh shuh ïa kane ka jingma haba nujor bad ka jingdih duma.
“Ha ka sien kaba nyngkong, ka jingpule bniah jong ngi ka kdew ïa kita ki jingïapher ha ka jingma hapdeng ka jingdih kyiad ba man la ka sngi bad ka jingdih kyiad ba san lane hynnriew sngi ha ka shi taïew hapdeng ki paid nongshong shnong shynrang”, la ong u nongtohkit ba lamkhmat, u Gro Askgaard, na ka University of Southern Denmark, Copenhagen.
“Naba ïa ki jingtip ba bniah ha kaba ka kyiad ka wanrah ïa ka jingthut jong u dohnud ym shym la tip satia, ngi lah ban shu antad ba ka daw ka lah ban long ba ka jingïoh tan ïa ka kyiad man la ka sngi ka lah ban nang pynjur shuh shuh ïa ka jingthut ne jingsniew jong u dohnud lane khanglad ïa ka jing ïoh bor biang jong u dohnud”, u la batai.
Ban bishar bniah ïa ka jingdih kyiad ba ka don jingïadei bad ka jingïoh pang kyiad u dohnud, na ka liang jong ki stad pule bniah hapoh Denmark ki la tohkit ïa ka jingma jong ka jingpang kyiad hapdeng jan 56,000 ngut ki nongiashim bynta kiba ha ka rta hapdeng 50 bad 64 snem hapoh ka Danish Cancer, Diet and Health study (1993-2011). Ka jingbun jong ka kyiad ba dih la niew kum ka jingkheiñ kyllum ïa ka jingbun ha ka shi taïew kita ki jait kyiad: beer, wine bad kyiad. Napdeng ki 55,917 ngut ki nongïashim bynta, 257 ngut ki shynrang bad 85 ngut ki kynthei ki la ïoh ïa ka alcoholic cirrhosis ne kata ka jingpang dohnud na ka jingdih kyiad, kaba ïa ryngkat bad ka jingjia jong ki 66 hapdeng ki shynrang bad 19 ha ki kynthei na man ki 100,000 ngut ki briew ha ka shi snem.
Ym shym la don kano kano ka jingpang alcoholic cirrhosis hapdeng kito kiba kiar na jingkyrni dih kyiad. Ha ki shynrang, ki jingshem ki la pyni ba ka jingdih kiad ba man ka sngi ka kyntiew ïa ka jingma ka alcoholic cirrhosis haba nujor bad kito kiba dih duna man ka por. Ki jingshem ki ai jingmut ruh ba ka jingdih kyiad ba dang shen bad ym ka jingdih kyiad ba shirta jingim, ka dei ka nongïathuh lypa kaba khlaiñ halor ka alcoholic cirrhosis.
Haba la nujor bad ka beer bad kyiad, ka waiñ la ïohi kumba ka don jingïadei bad ka jingduna ka jingma na ka alcoholic cirrhosis ne ka jingpang dohnud na ka jingdih kyiad. Hapdeng ki kynthei ne longkmie, na ka liang jong ki stad pule bniah kim shym la lah ban ai ïa ka rai kaba thikna ne khlaiñ na ka daw jong kata ka jingduna ka jinglum jingkheiñ, wat la haba kheiñ kyllum ki la shem ïa ka juh ka jingjia. Ia kine ki jingshem jong kane ka jingwad bniah la pynmih ha ka Journal of Hepatology.
