Ki kam kiba ka Sorkar MDA ka leh ym pat ju don baleh mynshwa ; kren arsap u Dr. Mukul

Shillong, Nailar, 17: U nongïalam ka Liang Pyrshah u Mukul Sangma ha ka sngi Balang u la ïaroh arsap ïa ka jingkren jong u Myntri Rangbah ka Jylla u Conrad Kongkal Sangma ha ka jingrakhe sngi ïoh laitluid kaba dang shu dep ha ka lah sngi u Blei mynta ka taiew.
U Conrad u la put turoi ïa ki kam kiba ka Sorkar MDA ka la leh ha kine ki saw snem shiteng da kaba ong, “nga phai dien ïa ki kam kiba la leh da ka Sorkar jong nga da ka jingsarong bad ka jingsngewhun.”
U Mukul, u la ong, ba u kubur ïa ka jingkren u Myntri Rangbah ba kane ka sorkar ba mynta ka la trei ïa kaba ki Sorkar barim kim pat shym la jop.
“Lada phi phaidien, la katno tylli shuh ki jingkynoh bamsap ba la rah hakhmat ka Sorkar bad ïa ka jinglen jong kane ka Sorkar ïa kiba ym pat ju kham jia koit ha ki snem ba la leit noh,” ong u Mukul.
“Namarkata, kaei kaba ki la leh, ym pat ju don ka sorkar barim ba la leh ha ki snem baladep, ym pat ju don nongïalam ha ki snem ba la leit noh ban leh,” u la bynrap.
U Mukul u la ong, ha ka jingshisha ha ki snem baladep, phin ïohi ïa ki nongïalam kiba don ka jingkitkhlieh hapoh ka Sorkar ban trei na ka bynta u paidbah bad ka jylla da ka jingkut jingmut bad ka jingshakri hok.
“Hynrei kane, kam shym la urlong ha kane ka sorkar ba mynta hyrnei ki jingkylli ki mih kawei hadien kawei pat, namarkata, kaei kaba u (Cornad) kren ka dei kaba shisha ïa kaba ki la jop hynrei khlem don eiei ha kaba wat ki paidbah ruh kim don jingkmen hynrei ka pynlong ïa ki ban pyrkhat sani,” u la ong.