Pynïap dusmon ki runar ïa u samla ba ñiah Tourist Taxi, lap ïa ka met na Mynkre

Khliehriat, Nailar, 17: Ki riewthrang snam bym lah ban ithuh durkhmat, ha ka sngi Baar ki la dkhat jubor ïa ka jingim jong u samla Fullmoon Kharsahnoh, na ka shnong Larnai, West Jaiñtia Hills District, uba dei u nongñiah kali kamai Tourist Taxi ba ju kamai na Jowai sha Shillong. Ïa ka met jong une u samla la lap na ka shnong Mynkre, East Jaiñtia Hills District na ka lynti ban leit sha Amrit Cement.
Une u samla, uba ju ñiah ïa ka kali Swift Desire kaba don ïa u nombar ML-04-D-1113 u la jah naduh hynin ka sngi Baar bad ïa ka met jong u la lap ha ka por janmiet.
Katkum ka jingïathuh jong u Hymmen, u Bah Batskhem Kharsahnoh bad u bahaing u Bah Lovingson Shadap, la ong ba ki runar ki la teh da u tyllai na ki kti ki kjat bad na ryndang jong u samla Fullmoon Kharsahnoh bad la lap ba ki don ruh ki dak mong ha ki bynta jong ka khlieh, ka ryndang bad ka dur khmat. La suba jur ba ki runar ki la pyndonkam da ki tiar pynmynsaw ban dkhat jubor ïa ka jingim jong u Samla Fullmoon.
U Hymmen jong u Bah Fullmoon Kharsahnoh haba bynrap u la ong, “kum u hymmen bad na ka liang ka iïng ka sem ngi dap da ka jingsngewsih kaba khraw ba ki leh beiñ ïa u para haduh katne. Ngam tip na kaei ka daw, namar hynnin ka sngi ha ka por 11:00 baje mynstep ki dang don kiba ïohi ïa u ha sor Jowai, hadien kata ngim poi pyrkhat ban jia kum kane. Dei ha ka por 12 baje mynsngi ngi la telephone ïa u ruh ka phone ka la shu lip, ngi sngew phylla namarba u dei u briew u bym ju pynlip ïa ka mobile phone mynno mynno ruh,” ong u Hymmen u Bah Fullmoon.
Ki Pulit jong ka Khliehriat Police Station tang shu ïoh jingtip halor kane ka jingjia ki la leit ban shimti noh ïa ka metïap bad ki la pyntip ruh sha Ummulong Out Post, West Jaiñtia Hills District bad ïa ka met la pynkit noh sha ka jaka buh metïap ha Khliehriat CHC bad hadien ba la pyndep ïa ki kam kiba katkum ka aiñ ha ka step sngi Balang ki Pulit ki la aiti noh ïa ka met sha ki bahaiïng hasem.
U General Secretary jong ka Jowai-Shillong-Guwahati Tourist Cab Association (JSGTCA) u Bah John Lyngdoh haba pynpaw ka jingsngewsih halor kane ka jingjia, u la ong, “ka Association ka dap da ka jingsngewsih bad ka jingsngew kyndit kaba khraw tang ïoh ïa ka khubor halor kane ka jingshah pynïap u paralok jong ngi uba ju don lang hapoh kane ka seng kamai kali na Jowai sha Shillong.”
“Dei naduh ka por 12 duna mynsngi, ki bahaiïng hasem kim ïoh shuh ban telephone ïa u. Hadien kata, marmar na ka liang ka seng ryngkat ba ki bahaiïng ngi la ïa wad bad dei ha ka por 2.18 minit noh phai sngi ngi la ïoh jingtip ba ïa ka kali jong u la ñiah da kiwei pat ki briew kata ka long katkum ka jinglap bad jingsakhi kaba na ka Toll Gate kaba don ha Lumshnong, East Jaiñtia Hills District bad lap ba ka kali ka hiar sharum,” la ïathuh u Bah John Lyngdoh.
U la ïathuh ba dei lyngba kane ka jinglap ksai, ki dkhot jong ka Association lem bad ki bahaiïng hasem ki la leit pyntip noh sha Ummulong Police Beat House halor ka jingjah jong u samla Fullmoon Kharsahnoh lem bad ka kali.
“Lyngba ka jingshimkhia jong ki Pulit, ha ka por kumba 10.30 mynmiet ngi la ïoh ïa ka khubor kaba sngewsih bad kaba pynkthang haduh katta katta ba une u samla uba dei uwei na ki paralok u la khladnoh ha kaba la lap ïa ka met jong u da ki nongshong shnong jong ka shnong Mynkre,” ula ong.
“Na ka liang ka seng, ngi kyrpad ïa ki bor bahalor, khnang ban shngaiñ ka leit ka wan, ngi kyrpad khamtam ïa ki bor Pulit ba kin sngewbha ban peit lem, ngi la duh ïa u paralok bad ka long ka jingduh kaba khraw. Nangne shakhmat, ki mynsiem kiba luilui kiba im ja bad bsa ïa ka iïng ka sem da kaba kamai kali kam dei shuh ban dang jia kum kane. Ngi kyrpad jur ïa ka Sorkar ba kan shimkhia ïa kane namarba kane ka ju jia na ka por sha ka por, namar tang hapoh shitaïew ngi lap ba ar tylli ki kali bad ki nongñiah kiba na rilum Jaiñtia ki la shu jah rngai kumne bad ngi lap ba ki kali ki dei kiba ju ïaid lyngba na ka Toll Gate Lumshnong. Ngim tip pat shaei ki don ki kali, kumta ngim kwah ba ki mynsiem ba luilui kin shu duh ei kumne,” la ong u Bah John bad bynrap, “ngi pan ka jingïatreilang bad ki seng kiba don ha rilum Jaiñtia bad ha rilum Khasi ba kin shim lem ïa ka jingkitkhlieh ban sumar syndong ba ym dei ban rieh hynrei ban mih shakhmat ban pynsngew lem sha ka Sorkar ba kan leh ïa kaba donkam,” la kyrpad u Bah John.
Ka Khasi Students Union, East Jaiñtia Hills District, lyngba u President u Bah Streamly.S.Suchen bad u Bah Cherity Suja bad ki nongïalam jong ka Jowai-Shillong-Guahati Tourist Cab Association (JSGTCA) ki la ïa don ryngkat lang bad ki bahaiïng ha Khliehriat CHC ban pynbiang ïa ka kali Ambulance na ka bynta ban pynpoi ïa ka met jong u samla Fullmoon Kharsahnoh sha iing.
Kine ki kynhun ki la pynrem jur ïa ki runar kiba donkti bad dawa ïa ki bor jong ka aiñ ba kin shimkhia ban thwet bad ban kem mardor ïa ki runar bad ki la pynpaw ruh ba ki suba jur ba ïa kane ka kam pyntriem la leh da ki bar jylla.