5 lak tyngka kular u Myntri ban ai jingïarap sha ka WJDSA

Jowai, Lber 27: U myntri ba dei peit ïa ka kam ïalehkai Sports jong ka sorkar jylla u bah Banteidor Lyngdoh ha kane ka sngi saitjait 26 tarik ula wan ban plie ïa ka jingrakhe dap 50 snem ne ka jubilee Ksiar jong ka West Jaiñtia Hills District Sports Association (WJDSA), kala la long ha madan Kiang Nangbah Stadium Ladthadlaboh Dongmihsngi Jowai.
Ha kane ka sngi la wan ban ïadon lang u MLA ma Kyrmen Shylla u Myntri ka Social Welfare jong ka sorkar jylla, Founder Member ka WJDSA ma S.K Lato, u DSO ma K. Passah, ki nongïalam ka Association naduh ma E.M.H Passah Working President, ma Lammat-oo Laloo Hony. General Secretary, kynthup ïa ki nongkitkam ba rim bad kiwei de.
Na ka liang u bah Banteidor Lyngdoh haba ai jingkren ha kane ka sngi ula ai ka jingïaroh ïa kane ka Association kaba don ïa ka kynhun kaba biang haduh ba la lah ban rakhe ïa kane ka sngi jingdap 50 snem, u kitbok ïa kane ka kynhun WJDSA ba kan dang ïaid shaphrang ha ka jingshakri ha ka liang ka kam Sports.
Ula ïathuh ba ka sorkar lyngba ka tnad sports ka la don jingmut ban siang ïa u ‘Synthetic Athletic Track’ hapoh katei ka madan ïalekai jong ka Kiang Nangbah Stadium lyngba ka skim Khelo India ryngka ka jingïapynpeit bad ka WJDSA bad ka kam mynta ka la ïaid shaphrang.
Kum u myntri ula kular ruh ban ïarap pynshna ïa ki jaka peitkai (Gallery) bad ki jaka rung bad mih ki Player sha madan, da ka jingthmu ban pynurlong noh ïa kane mynta hi ka snem shwa ban poi ka samoi Election MLA 2023.
Ula pyntip ba ka tnad Sports kala pynkhreh ïa ka skim ban shna ïa ki 8 tylli ki Futsal kiba biang lang ryngkat ki light ban ïoh ïalehkai haka por mynmiet, Kumta na ka liang u Myntri ula rai ban buh kawei ka Futsal ha Jowai khnang ba ki samla kin ïoh ban ïashim bynta ha kum kane ka jingïalehkai (7-A-Side) bad ha ka juh ka por kin lait ruh na ki jingmlien ba sniew namar wat na ka liang ki rangïalehkai ka jylla kiba la shongthait ki la kloi ban long kum ki Academy.
Ha kaba ïadei bad kawei na ka kynhun ïalehkai phutbol kaba paw bha napoh kane ka thaiñ ka ‘Ñiaw Wasa United’ ula kular ban ai jingïarap ïa ka jingdonkam jong ki lyngba ka mang tyngka ka dep pynkhreh da ka sorkar, ula pynsngew ba ka sorkar ka don jingthmu ban pynkiew ïa ka kam ïalehkai sports da kaba mang pisa haduh 400 klur tyngka.
Shi bynta ban pynkhreh ïa kane ka jinglehkmen jong ka jingdap 50 snem ka West Jaiñtia Hills District Sports Association (WJDSA) na ka liang u Myntri ula kular ban ai jingïarap haduh 5 (san) lak tyngka.
La pynphuh pynphieng ïa kane ka sngi da ki jingrwai, ki jingshad tynrai, ki jingïalehkai Drill na ka WJDSA bad ki khynnah skul ka North Liberty HSS, ha kane ka sngi la pyllait paidbah ruh ïa ki Ticket Lucky Draw bad ka jingsam khusnam sha ki Founder Member ba ki nongkitkam ba rim ne ki Ex Office Bearers. Shi bynta na ka jingrakhe dap 50 snem na ka liang ka WJDSA kala dep ban pynkhreh shibun ki prokram jingïalehkai ha baroh shisnem lynter.