Shillong, Nailar 17 : Kumba la dep kular da u Myntri Rangbah ka jylla u Conrad K Sangma bad kumjuh ruh da u Symbud Myntri Rangbah bah Prestone Tynsong ban wanrah ïa ka kaiphod jingtohkit hapoh ka ïing dorbar ha kane ka Dorbar Synrai ka ban sdang naduh ka 9 tarik Nailur 2022, kumta ruh u MLA jongka Mawlai Constituency u bah Process T Sawkmie u kyrmen ba ka sorkar kan leh ruh bad ka kam bad wanrah beit ïa kane ka kaiphod jingtohkit halor ka jingshah siat iap jong u bah Cherishterfield Thangkhiew mynta ka kynti hapoh ïing dorbar.
Haba ïakren bad u Mawphor u bah P.T Sawkmie u la ong “ Kumba ki paidbah, ki Seng bapher bapher ki la kwah bad thrang eh ban paw paidbah ka kaiphod jingtohkit kumta ruh nga kyntu ïaka sorkar ba kan shim khia bad wanrah ïa kane ka kaiphod ha kane ka dorbar Synrai khnang ba ngin ïoh ban ïa bishar bniah bad ïatai sani bha halor ki jingai jingmut jong u Nongbishar. Nalor kata nga ngeit skhem ruh ba ka sorkar kan pynsaja beit ïa kiba dei hok ban pynsaja kat kum ka jinglap ka Commission ba la khlieh da u Nongbishar ba la shongthait u Justice T Vaiphei halor ka jingshah siat iap u bah Cherishterfield Thangkhiew, General Secretary ba rim ka seng HNLC”.
U la ong ruh kumba ki paidbah ki la pynlong jai jai ha ka jingrakhe ïaka lyngkhuh snem sngi iap ba shisnem jong u bah Cherish da kaba pynlong da ka jingleit buh syntiew bad pynlong ka jingïalang khlem kino kino ki jingkulmar kumta ruh ka sorkar ka dei ban burom ïaka sur ki paidbah bad wanrah beit ïa ka kaiphod hapoh ka ïing dorbar khnang ba baroh ki MLA kin ïoh ban ïatai ïathir halor kane ka kaiphod jingtohkit Justice T Vaiphei Commission.
