Shillong, Nailar 16 : U Myntri ba dei peit ïa ka tnad PHE bad MLA ka Mawkyrwat u bah Renikton Lyngdoh Tongkhar u la ong ba ka jingthmu jongu ban phet noh na ka seng HSPDP ka dei namar ba u kwah ban pynkhlaiñ tang ïa kawei ka seng riewlum ha kane ka jylla kaba la rim bad khlaiñ lypa ka United Democratic Party (UDP) namar donkam ban don noh tang kawei ka seng riewlum kaba khlaiñ ha ka jylla.
Wat la u dang dei u MLA jongka HSPDP kat haduh mynta hynrei ka HSPDP ka la dep rai ïa u bah Medalson Lyngdoh Tongkhar kum u kyrtong jongka na Mawkyrwat bad halor kane ka jingleh jongka party u bah Renikton um kwah ei ei ban kynthoh. “ Ki la dep rai ïa u kyrtong te phi tip hi ym don jaka hi shuh hynrei ngam kwah ban kynthoh ne ong ei ei ne kynnoh ïano ïano ruh halor kane”.
U la ong ba ïaka Regional Democratic Alliance (RDA) la thaw da ka UDP bad HSPDP da ka jingthmu ban pynklhaiñ ïa ka seng riewlum ha Meghalaya. U la ong ki don kiba kwah ban pynkhlaiñ lut ïa ki seng riewlum ha kane ka jylla hynrei kiba bun hi ki nongïalam ki kwah beit ban pynkhlaiñ tang ïa kawei ka seng riewlum ha kane ka jylla.
“ Kumta nga ruh nga long uwei na kita kiba kwah ban pynkhlaiñ tang ïa kawei ka seng riewlum” ong u bah Renikton. U la ong hooid ka long kaba shisha ba yn ym don nongïalam ba kwah ban pynkut ne pynwai noh ïa ki seng riewlum jongki, “ Hynrei mynta ngi hap ban kawang ïa ka bol sha ki paidbah ba kin sngewthuh ba ngi donkam shisha tang ïa kawei ka seng riewlum ka ban ïeng rasong ha kane ka jylla bad jop bun ki MLA. Hynrei lada ki paidbah ruh ki kwah ban don bun ki seng saiñ pyrthei ka result jongka election hi kan sa batai shai. Kumta ngi ieh ha ka jingstad bad jingshemphang jong ki paidbah jong ki constituency bapher bapher. Haba la kylli hato un pyrshang ban ïakren bad ki MLA ban ïatrei lang beit tang ha kawei ka party, u la ong hooid ka jingïakren ka ïaid hynrei kum ki nongïalam ki la tip lypa hi shano ban leit bad kam da donkam eh ban leit pynbor ïaki ki hi kin jied namar ki la rangbah ha ka jingmut jingpyrkhat bad ki tip hi ruh kaei kaba bha bad ka por kan sa batai hi ba kin rai hi da lade”.
U la ong lada ki paidbah ki jied ïa kawei ka seng riewlum kaba khlaiñ lehse kiwei ki party rit kin ym jop bun hi ruh ha ka election ban wan. Tangba kawei ruh ka long kaba eh ban kren lypa namar kiba bun ki MLA ki jop ha ka jinglong shimet jongki ym dei eh na ka party .
U la ong ba ka jingkren ba ki seng riewlum ki kut tang ha Khanapara ka dei tang ka jingkren lait jynhaw namar lada ka seng riewlum ka jop bad synshar ha ka jylla ym don ba lah ban khang ïa ka ha Khanapara, ki nongïalam jongka kin leit sha Delhi ban leit pan jingïarap na ka sorkar pdeng kumta ym don khyrdop ban khang ïaki tang ha Khanapara.
