Shillong, Nailar 17 : Ka Mawsynram C&RD Block shen kan sa ïoh noh da ka ophis treikam kaba thymmai bad kaba heh kaba yn tei ha ka jinglut kaba kot sha ka 3klur tyngka.
Ïa kane la ïathuh da u Myntri ka tnad C&RD ka sorkar Meghalaya Bah Hamlet Dohling hadien ba la plie ïa u mawnongrim ban tei ïa katei ka ophis ha ka jingïalang kaba long ha Mawsynram. Ha kaen ka sngi buh mawnongrim la donlang ruh u MLA ka thain Bah Himalaya M Shangpliang, Director ka tnad, u SC Sadhu, u Project Director ka DRDA, Bah D Hynniewta, u BDO ka Mawsynram Bah P Mukhim nalor ki ophisar bad ki paidbah kiba wan na kylleng.
Na ka liang u Kongsan haba kren ha ka jingïalang u la ong ba ka Block ha Mawsynram kadei kaba la rim bha. U la ïathuh ruh ba ha ka jingleit jurip kylleng ki block kiba don ha ka jylla teng teng la isynei ïa ka jinglong ka ophis. “Ki don ki ophis block ba dang dei ki Assam-type (tap tin) ha kaba naduh ki ophisar haduh ki nongtrei ki shem jynjar ban shong bad treikam,” ong u Bah Hamlet Dohling.
Kumta, u la ïathuh ba ha ka jingïakren bad u Myntri Rangbah ki la rai ba ym dei shuh ban shu ieh kumto ïa kitei ki jaka treikam kiba tyngkhuh man ka sngi bad ki paidbah. “Kumta ngi la rai ban shna thymmai ha baroh 46 tylli ki block. Hynriew tylli ngi la sdang shna bad 40 tylli kin sdang noh shen,” u ong da kaba pynpaw ruh ba ka ophis treikam ha Mawsynram kadei kawei na ki 40 tylli.
Katkum ka jingong jong u Myntri, jan baroh ki kam pynroi ha ki nongkyndong khamtam eh ka skim MGNREGA kadei kaba peit da ka Block nangta sa ki VO bad ruh ki SHG. Kumta, u ong ba kadei ka kam kaba eh bha ïa ki ophisar lada ka jaka treikam kam dei kaba biang.
U Myntri u ai ruh ka jingïaroh ïa u Bah HM Shangpliang kum u MLA uba la buddien na ka por sha ka por ban pyntikna ba katei ka ophis ba thymmai kan urlong noh mardor ha ka constituency jong u.
Na ka liang u MLA pat u la ongba katei ka ophis treikam ba thymmai kan long kum ka jingpynkhreh na ka bynta ka Civil Sub-Division kaba thymmai ha katei ka thaiñ. “Kane ka iing kaba kham heh kaba ngi ïoh na ka tnad C&RD da ka ophis kaba kham heh shuh shuh kan long ka jingpynkhreh na ka bynta kaei kaei kaba kham heh, kata ka Civil Sub-Division,” ong u Bah HM Shangpliang.
Nalorkata, u ong ruh ba ynda la dep katei ka ophis, kim donkam shuh ban ker dara haba don ka jingïalang jong ki nongïalam shnong hapoh Block namar kan don kyrpang kawei ka kamra heh na ka bynta kum kitei ki jingïalang.
U Bah Shangpliang u la ai ruh ka jingïaroh ïa ka sorkar na ka bynta kiba bun ki kam pynroi kiba la poi ha katei ka thaiñ kynthup naduh ka surok, ki jaka ai jingsumar bad kiwei kiwei.
