Jowai, Nailar 17: Ka All Jaiñtia Muster Rolls Workers & Labour Union (CEC) kaba la seng ha ka 17 tarik u Nailar, 2018 mynta ka sngi ka la pynlong ïa ka jingïakynduh lang ne ka ‘7th Annual General Meeting’ ha madan Mini Stadium ASSA Ladjaplem Amlarem Sub-Division, halor ka phang kaba ong “Leh bha katni u kune i ya ka mynried u chngaiñ, pateiñ u kyllep u sdep”.
Ka jingïalang ha kane ka sngi kala long kaba i shongkun bha namar ka jingwan shongshit jong baroh ki para nongtrei bylla sngi na kylleng ka Ri-Lum Jaiñtia kiba kynthup naduh ki nongtrei Muster Rolls, ki nongshet ja Mead Day Meal (PM-Poshan), ki Mistery, ki nongshong dukan, ki nongdie kwai dong, nongsuhjaiñ bad kiwei de ki nongbylla bylla sngi.
Ha kane ka sngi la sdang ïa ka jingïalang hapoh ka jingpynïaid u President ka AJMW&LU Jowai Unit ma Phrangsngi Sutnga, la ïoh ruh ka jingkren pdiang da ka kong Dayoowanphi Iakai President AJMW&LU, katba na ka liang ki briew na ka tnad Labour la wan ban ai jingbatia bniah da ka kong Bethcy M Toi ka Labour Inspector, O/o ka ophis Deputy Labour Commissioner West Jaiñtia Hills District, Jowai.
Ka kong Bethcy M Toi ka la pynsngewthuh bniah sha baroh ki nongbylla sngi shaphang ki lai tylli ki jait skim kiba lah ban ïoh jingïarap na ka sorkar, kaba nyngkong ka dei ka e-Shram ha kaba ki nongïoh myntoi ka long naduh ka rta 16-59 snem, da kaba kin hap ban register shwa ïalade lyngba ki Common Service Centres (CSC) kiba don hajan da kaba pyndonkam ïa u Aadhaar Card, EPIC, Passbook bad u Phone No.
Kaba ar kala batai shaphang ka skim Pradhan Mantri Shram Yogi Maan-dhan (PM-SYM) na ka bynta kito ki nongtrei bylla hapoh 40 snem ka rta bad hadien ba la palat 60 snem ki lah ban ïoh jingïarap kum ka bai bam tymmen kaba haduh 3 hajar tyngka shibnai, hynrei lada khlad noh kiba ha ïing kin ïoh 15 hajar tyngka ha ka shibnai.
Ïa ka skim kaba lai ka kong Toi kala batai shaphang ka skim kaba lah ban ïoh jingïarap tang na ka bynta ki nongtrei Misteri da kaba kin hap ban wan register na ka ophis Labour, kane ka skim ka lah ban ai jingïarap lada jia ba ïap ha ka por ba don ha ka kam kaba long haduh 5 lak tyngkat bad lada duna haka dkhot met na ka jingmynsaw kin ïoh 1 hajar tyngka haka shibnai, kumta ka kyntu ïa ki Misteri baroh ba kin shim ïa kane ka kabu.
Katba na ka liang u ma Khroo L Pariat uba long u Adviser ka AJMM&WU (CEC) Jowai ula kyntu ïa baroh ki nongtrei bylla sngi ba kin don ka jingïatylli ban pynduh pyndam noh ïa ka kam bamsap kiba wan pynshoi na ki riew don spah bad kiba khwan myntoi shimet.
Ula kyntu ruh ban pynduh pyndam ïa kine ki kam sniew kynthup naduh ka jingdih buaid, ka jingkwah bor, ki kam awria bad kiwei ki kam sniew hapoh ka imlang ka sahlang khnang ban ïoh ïa ka shynshar ka khaddar kaba khuid ba suba.
Ha ka juh ka por u kyntu lang ban long kiba sumar ïa ka mariang naduh ki um ki wah, ki lum ki madan, ki khlaw ki btap, khnang ba ka pateng kan dang neh dang sah namar kumba long mynta ula ong ba ki briew ba don ha ka bor kila thmu bam pynduh pyndam ïa baroh ki jingitynnad jong ka mariang.
Da kaba u pynkut ïa ka jingkren u ong “Haba leh ïa kino kino ki kam ha ka jingim dei ban leh naduh ka mynsiem” khnang ba kan long kaba itynnad bad kaba lah ban pynhun ïa kiba bun ba lang.
Ha kane ka sngi la ïakren ha kaba ïadei bad ka bainong jong ki nongtrei Mid Day Meal ban pynkiew noh ïa ka honorarium ka jong ki na ka T.1000 sha ka T.5000 shi bnai bad ban siew 12 bnai ym shuh tang shi phew bnai bad ka jingïarap shuti haba pang ba shitom.
Lada ka sokar kam jubab ïa ka jingdawa hadien jong une u bnai Nailar, 2022 kaba kila shah slem la 20 snem mynta kin pynlong syndon da ka jingïakhih ha nongbah Shillong khnang ba ka sorkar kan sngap ïa ka jingdawa.
La pynsngew ba ka Sorkar Meghalaya ka dei ban pyntreikam ïa ka hukum ka Finance Department ban wanrah sha ka kyrdan Semi Skilled ïa kito kiba la trei palat ïa ka 5 snem kum ki muster roll.
Ha kane ka sngi la ïoh ruh ban pynsngew ïa kam na ki Unit bapher bapher kumjuh ïa ka Annual Report na u ma D. N. Suchiang General Secretary, AJMW&LU (CEC), ka jingïoh bad jingpynlut ka seng bad kiwei kiwei de.
La pynshong shit shuh shuh ïa kane ka jingïalang da ki jingrwai ba la shim bynta na ki nong shet ja sngi ha ki skul kiba la rwai kyntu na ki nongmihkhmat ba kin sngew ïa ki jingeh kaba ong “To Kynmaw lem ïa ngi, to ïarap ïa ngi”, ka jingshad tynrai bad ka jingïalehkai Skit.
