Shillong, Nailar 17 : Ka All Meghalaya Karate-Do Association (AMKA) ka la pynbna ïa ki saw ngut ki nongïalehkai karate kiban leit ïashim bynta sha ka lympung ïalehkai karate Thailand Open Karate-Do Championship kaban long ha Phuket naduh ka 19 tarik mynta u Nailar 2022.
Kitei ki saw ngut ki nongïalehkai karate ki kynthup ïa u Ferdinand S Rani, Gregorwilson Makdoh, Saralin Rynghang bad u Damanbha Pde, kine ki samla kidei ruh kiba la khur takma teng la ka long hapoh la ka jylla, bad ha ki jingïalehkai national.
Kitei ki saw ngut ki samla kin min na la ka jong ka jylla sha New Delhi mynta ka sngi Palei (18-8-2022) ha kaba kin sa kynduhlang ryngkat kiwei pat ki nongïalehkai jong ka kynhun ka ri bad kin mih na New Delhi ha ka sngi kaba bud (sngi Thohdieng) ban leit sha Thailand.
Ka jingïalehkai kumite (bouts) bad kata (form and movement demonstration) kan sdang ha ka 20 tarik Nailar bad katei ka tournament kan kut ha ka 23 tarik Nailar. Kitei ki saw ngut ki samla ka jylla kin wanphai pat sha India ha ka sngi kaba bud kata ha ka 24 tarik Nailar 2022.
Ha u bnai ba lah dep, u Damanbha Pde u la jop ïa ka takma rupa bad ka Saralin Rynghang ïa ka takma rnong ha ka All India Karate Championship kaba la long ha Chhattisgarh. Shwa ba ka jingwan lyngshop ka khlam jingpang Covid-19, u Gregorwilson Makdoh bad u Ferdinand S Ranihad ki la jop ïa ka takma ksiar bad takma rnong ha ka Kanninjuku National Shoto Cup Karate Championship kaba la long ha Maharashtra.
“Ka association ka kwah ban ailad ïa ki nongïalehkai ban leit ïakhun shabar na la ka ri namar la ar snem ki khlem ïoh shuh ban ïashim bynta,” ong u President ka AMKA u Bah Hunlang Lytan haba ai jingkren ha ka jingïalang shwa ba kitei ki samla kin mih na la ka jong ka jylla.
Haba pynpaw halor ka jinglyngshop ka khlam jingpang Covid-19 u Bah Hunlang u la ong. “Kine ki samla ki la ïashim bynta ha ki jingïalehkai national hynrei ka ïapher shibun na ki jingïalehkai national bad international,” u la bynrap da kaba ai khublei ïa ki kmie ki kpa kiba la ju kyrshan ïa la ki jong ki khun ha ki jingïaid lynti jong ki ban leit ïakhun la ka long hapoh la ka ri bad shabar ri ruh kumjuh.
Ka AMKA ka la thaw bun tylli ki history ban wanrah takma bad ïa ka burom na bynta la ka jong ka jylla Meghalaya bad kane kam dei ka sien kaba nyngkong ba ki samla ïalehkai karate kin leit ban ïashim bynta ban ïalehkai shabar na la ka jong ka ri.
Ha u Naiwieng 2019, ka Wandahunshisha Mawblei ka la jop ïa ka takma ksiar na bynta ka ri India na ka 5th South Asian Karate Championship kaba la long ha Bangladesh. U Damang Syngkon u jop ïa ka takma ksiar na ka South Asian Games ha u 1999. U Syngkon, ka Linza F Syiem bad Wandashisa Warjri kidei tang ma ki ba jop takma na bynta ka jylla Meghalaya ha ka 34th National Games 2011.
“Ka Thailand Open kadei ka tournament kaba heh kaba khring ïa shibun ki nongïalehkai karate na kylleng ki ri jong ka pyrthei. Ka sien kaba khatduh ba ki don ki nongïalehkai karate kiba la ïakhun ha ka Olympic Games 2020, kumta kane kadei ka kabu ksiar na bynta ki samla ïalehkai jong ngi,” ong u Bah Ksan Kupar Warjri General Secretary ka AMKA.
U Bah Ksan u la ïaroh ruh ïa ki coach ba kynthup ïa u Donboklang Lyngdoh, Arjun Sewa, Linza Syiem bad Mingson Rymbai kiba ju trei shitom na bynta ban hikai ïa ki nongïalehkai ha kiba bun ki liang. “Nga kyrmen skhem ba ki samla kin ïalehkai bha, ban ïakhun da ka mynsiem kaba thrang shisha bad ban wanphai ryngkat ka jingjop bad ban ïasam lem sha kiwei ki nongïalehkai ka jylla kaei kaba ki ïoh na katei ka tournament.”
