Ki Dorbar Shnong ki dei kita ki paia synshar kiba ïajan tam bad ki paidbah. Lada dei ba pyndonkam hok ïa ki Dorbar Shnong ki lah ban leh bun kiei kiei ban kham pynsuk ïa ka jingim khamtam sha ki nongkyndong jongngi kiba shem shitom palat ka leit ka wan bad kiba shem jingeh khamtam ha ka ban ïoh ïa ka jingsumar ha ki hospital kiba pynïaid da ka sorkar. Haba phai sha kiba bun ki nongkyndong ngi shem ba kito kiba duna jingïoh ki hap ban leit phah sumar ha ki hospital sorkar, katba kiba kham ïoh kam kot pat ki leit sha ki hospital kiba pynïaid da ki riew shimet lane da ki riew niam. Ki ba bit ba biang kim kwah satia ban leit sha ki hospital sorkar namar ki sngew ba kam biang ka rukom sumar bad lada donkam lei lei ban thiah te ki sngew saitmet tang ban peit ia ka jingjakhlia jong ki jaka leit shabar.
Bunsien kiba duk bad ki bym kot bor ban leit shim dawai na ki hospital ne jaka ai dawai bym dei jong ka sorkar (private) ki ïam rem namar ba ki ong ba ym don ba salia lem na ka bynta jong ki ne ba sngap lem ïa ki. Dei na kane ka daw ban ngi ong ba ka “Sur Paidbah” ka dei ban sawa jam ha ka ri synshar paidbah. Lym kumta ka ri ka kylla long kaba synshar da ki heh spah na ka bynta ki heh spah. Mangi ki paidbah ngi shu ïoh tam tang kiba tam bad ki lyngkhot lyngkhai kiba kita ki nongsynshar ki sngewbha lem ban ai, tang ban ïoh put turoi ba ki lah leh ei ei na ka bynta jongngi. Ha ka jingshisha ki Dorbar Shnong keiñ ki dei ban pynïohsngew lem ïa ka sur ki paidbah sha ka sorkar lane sha u MLA, uba dei ban kitkhlieh bad bud dien ïa ki kam pynroi baroh ha ka konstituwensi.
Kaba sngewsih eh ka long ka jingshem jingeh jong ki kynthei kiba ar-met bad kiba suh kha bad kiba shong ba sah jngai na ka Sub Centre, ka Primary Health Centre (PHC) ne ka Community Health Centre (CHC). Mano ba ju pyrkhat lem na ka bynta kita ki kynthei armet kiba hap ban shim da ka kali kamai ban poi sha PHC ne CHC. Teng teng ynda lah poi hangta ki doctor kim don bad ka jaka kha khunlung kam biang khamtam lei lei lada dei ban shu puid noh ban shim ïa I khunlung namar ba shitom eh ka kmie. Ka jingiap kha-khun ki longkmie (maternal mortality) ha kane ka jylla Meghalaya ka long kaba bun tam ban ïa kiwei pat ki jylla. Kaba kham hiar ban ïa ka jylla Meghalaya dei tang ka Bihar. Haduh katta ngi lah hiar ha ka koit ka khiah. Nalor kata ban sa ka jingduna snam (anemia) ïa kumba 56 na ka 100 ngut ki kynthei. Palat mar shiteng ki kynthei ha ka rta naduh 19-45 snem ki duna snam. Namarkata ki khunlung kiba ki kha ruh kim khlaiñ bha. Bad namar ba ban ka jingduk bad ka jingbun khun lah nang ban ki jingpang har rukom. Bunsien tang ka insurance kaba siew ka sorkar kam biang satia.
Ha kine ki khyndiat snem la sdang mih kita ki Village Health Council lane ki seng trei lang na ka bynta ka koit ka khiah ba la pyntrei da ka National Health Mission. Ha kine ki VHC centre ki doctor bad nos ki wan ban eksamin bad peit khamtam eh ïa ki kynthei armet kiba donkam ïa ki dawai tei snam (Iron tablet) bad ki dawai tei bor met (Vitamin). Lada ki Dorbar Shnong ki peitngor ba kin trei kam bha kine ki VHC kan ïarap shibun eh ban pynduna ïa ka jingduh ei ka jingim jong ka kmie kaba kha khun lane ka jingiap ei jong I khunlung (infant mortality), na ka daw bym biang ka koit ka khiah jong ka kmie. Ki Dorbar Shnong ki dei ban ai jinghikai ïa ki kynthei bad samla ba kin kren bad pynïohsngew ïa ki jingduna ha ki rukom sumar pang ha kine ki SC, PHC bad CHC. Lada ki Dorbar Shnong ki ki peitngor ki doctor bad nos ruh kin kham kitkhia ïa la ka jong ka kam.
Ha sor Shillong, ngi ïohsngew baroh shisngi ïa ka sur ki ambulance kiba kit ïa kiba pang jur sha ki hospital. Kaba sngew diaw ka long ha ki nongkyndong pat ym don satia kita ki ambulance kit pang. Dei na kata ka daw ba ki kynthei armet kiba lah suh kha ki hap ban shim da ka taksi ne ka sumo bad siew da ki hajar. Hato pyrkhat lem ïa kiba shnong shnong sha Maweit kaba tang kumba 30 kilometer na Nongstoin hynrei namar ba sniew palat ka surok shim por haduh 3 kynta ban poi. Kham mynshuwa don tang ki sistar na shiliang duriaw na Spain kiba wan seng ïa ki jaka ai dawai ha Maweit. Lada ym don lei lei sa kine ki nongleh bha te tip yn jia aiu ïa kiba bun balang ha nongkyndong. Sngewphylla ba la dap 50 snem ka jylla hynrei tang ïa kiba donkam eh kum ki lad ai jingsumar bad ka thoh ka pule ngi dang sah dien bha ha kane ka jylla. Ym dei ban thew ïa ka Meghalaya tang da kaba ïohi ha sor Shillong. Kane ka jingsahdien ka wan namar ki Dorbar Shnong kim shym sngewthuh bad bad pyndonkam hok ïa la ka iktiar. Ki Dorbar Shnong la thung ban synshar shnong. Kata ka kynthup lut nadong shadong. Ki dei ban pynïohsngew sha ka sorkar shaphang ki jingdonkam kiba hakhmat eh ha shnong, kum ban pynïoh um bam um dih, ki surok rong kiba biang, ka bor ding elektrik, ki skul bad ki kolej bad khamtam eh ïa ka koit ka khiah.
Bun bah ki khynnah jong ngi naduh dang ar ne lai snem bad haduh 10 snem kim ïoh ïa ki bam kiba tei namar ki kmie ki kpa kim kot bor ban pyndih dud bad ban ai ïa ka bam kaba tei. Lah shu bam shisha tang ban im. Nalor kata lada kha khun iwei hadien iwei khlem da pynjlan ka jingeh ka wan halor ka kmie, nalor ba ka la duna snam lypa. Ha ki Dorbar Shnong dei ban ïatai ïa kine kiei kiei kiba ktah ïa ka iap ka im jongngi. Kam bha ïa ki Dorbar Shnong ba kin ïa noh shiliang politiks sha ka diang ne ka mon. Ki dei ban long kiba laitluid bad ki bym ïashah liang ïa uno uno/kano kano u/ka kyrtong ïaleh elekshon. Lada ki Dorbar Shnong ki noh shiliang sha ka politik ki duh noh ïa ka jingshaniah ki paidbah.
Namarkata ai ba ki Dorbar Shnong kin long kiba lait na ka politiks bad kiba khlaiñ ban trei bad pyndep ïa la ka Kamran synshar shnong.
