Tyrsad, ‘Nailar 14: Ka Nehru Yuva Kendra Sangathan, Shillong ha ka sngi saitjañ jong ka taïew ka la pynlong ïa ka Youth Development Campaign ha Tyrsad Umkseh, East Khasi Hills District. La wan ban ïashimbynta da ki dkhot ki Self Help Groups (SHGs), ki Youth Club bad kiwei kiwei ki kynhun treimon sngewbha ka thaiñ.
U bah Lamphrang Blah, MDC ka thaiñ u la long u kongsan ha katei ka lympung ai jingpynshai bad ha ka jingkren jong u, u la kyntu ïa ki samla ban saiñdur ïa ka jingim da ka jingñiewkor ïa ka por ym ban pynsep-ei ïa ka bad ruh kum ki dkhot ki kynhun treimon sngewbha ban im sngi ban ai ka jingshakri kaba kordor na bynta ka bha ka miat kiba bun balang.
U bah Staising Kharbteng, uba long u Sub-Inspector of Schools, South West Khasi Hills District, Mawkyrwat ha ka jingkren jong u kum u symbud kongsan u la pynpaw ba ki samla ki don ka bynta kaba khraw ban noh synñiang ïa ka jingkiew shaphrang ka Ri bad lyngba ki Youth Club, Self Help Group bad ter ter, ki khun samla, ki longkmie ki lah ban leh shibun ki kam ban ïatei bad ruh ban wanrah ïa ki jingkylla ha ka pyrkhat pyrdaiñ ne mental revolution ban long ki nongshong shnong ba ai jingmyntoi ha bun ki liang.
U bah D. Rapsang, Deputy Director ka NYKS, Shillong u la batai ïa ki jingtreikam katei ka tnat da kaba khot ïa ki sengtreimon sngewbha ban pynïasnoh ne affiliate bad ka tnat na bynta ba kin lah ban pyntyllun ïa ki kam ban noh synñiang ïa ka imlang sahlang ha ki bynta bapher bapher.
La ïoh ruh ïa ka jingkren na u samla Khrawpyrkhat Rynjah President KSU Tyrsad Circle, kong D. Umdor dkhot ka Tyrsad Area Sports Association bad u samla Wanjingmut Jaba.
La pynïaid ïa ka jingïalang da i samla Ibakordor Rynjah iba dei i National Youth Volunteer, Mawphlang Block ka NYKS.
