Shillong, Nailar 14: Ka kynhun ki Samla ka Jylla ryngkat ki riew rangbah, ki la noh synñiang ban ïarap ïa u Bah Hubert Paliar, u Rangbah u ba don hapdeng ka jingduna ki dkhot met u ban leit ïakhun ïa jingïakop khun kti ne Arm Wrestling sha Turkey.
Lah ban kdew hangne ba u Bah Hubert uba shong ba sah ha Nongkseh, u la shah jied ban leit ïakhun sha ka World Championship ha Turkey, hynrei u la shem jingeh ban leit namar ba um ïoh jingkyrshan na ka sorkar. Hynrei la don katto katne ki samla na Shnong jong u, kiba la isynei bad ki bym kwah ba ka sap kaba u don ha kane ka jingïalehkai Sport kan sepei noh. Ki la pynmih da ka video ha kaba i kurim jong u, i la kyrpad lyngba ka video namar ba u Bah Hubert um lait bha ban kren.
Lyngba kane ka jingkyrpad, kiba bun ki ka ïa noh synñiang bad ka pisa kaba la noh da ki samla bad kiwei kiwei pat ka la mih haduh 1,75,300 tyngka. Ka pisa ka la poi 75,300 da ka kti kine ki samla ba la leit ai ha ka 12 tarik bad 1 lak pat ka poi beit ha ka account jong u Bah Hubert.
