Shillong, Nailar, 09: Ka Khun Hynñiewtrep National Awakening Movement (KHNAM) State Youth Wing ka la pynpaw ïa ka jingpyrshah kaba jur ïa ki kyndon phylla jong ka Sorkar Jylla pyrshah ïa ki dukan die doh sniang bad doh masi, kiba don ha shilynter ki dukan ka thain upper Shillong.
“Ka Commissioner of Food Safety ka la bthah ïa ki dukan die doh ban ai rong, ban ker da ka iit ïa ka doh ba die, ban phong ki jain ba khuid, ha kine ki sngi ba la dep. Kine kidei ki ba donkam ym tang ha ki dukan jong ka thain upper Shillong hynrei ha baroh kawei ka jylla, bad kane kadei ruh ka kamram jong ka Food and Safety Department na ka bynta ka koit ka khiah jong u paidbah,” ong u kyrwoh na u President ka KHNAM-State Youth Wing u Bah Thomas Passah.
“Hynrei ka seng ka sngew phylla ban ïohi pat ba kane ka tnat ka la bthah ruh ïa ki dukan ban ai rong saw ïa ki ba die doh masi bad rong lieh ïa ki ba die doh sniang, bad kaba kham sngewphylla ka long ba la bthah ruh ban burieh ïa ka doh lyngba ka iit iong khnang ba ki tourist mynder ki ym ïohi,” ong u kyrwoh.
Ha kaba ïadei bad kine ki kyndon phylla ka seng ka kwah ban kren shai ba kane kam dei ka kamram jong ka Food and Safety, hynrei kine ki kyndon phylla ki kdew shai ba ka sorkar jylla ka la ïoh ïa ka jingbthah na ka sorkar pdeng ban burieh ïa ki doh kiba ngi ki riewlum ngi bam naduh kulon kuman tang na ka bynta ka burom jong ki bar jylla ki bym bam doh sniang lane doh masi bad kane ka long ka jingniewbieng ïa ngi ki riewlum, u la ong.
“Ki tourist kiba wan kai sha ka jylla ka jong ngi kim don hok ban tuklar kaei ngi die lane kaei ngi bam, bad lada kim sngewtynnad kan bha ïa ki ban ym wah sha ka jylla jong ngi. Ban ai rong saw ïa ki dukan die doh Masi, rong lieh ïa ki dukan die doh sniang bad ban burieh ïa ki da ki iit iong ka long ka jingkhien poh ïa ngi kum ki riewlum, bad ka sorkar kadei ban weng mardor kum kine ki kyndon,” pynkut u kyrwoh.
